silap pissusia

Silap pissusia G20-nit isumaqatigiiffineqanngitsoq

G20-t ataatsimeersuarnerat naammassivoq, aqutsisulli isumaqatigiissuteqarput. USA-p Paris-imi isumaqatigiissummut peqataarusunnginnini attatiinnarpaa.

G20-t ataatsimeersuarnerini, Frankrigip præsidentia Emmanuel Macron, Ruslandip præsidentia Vladimir Putin aamma Tyskit kansleriat Angela Merkel

G20-t aqutsisui, nunarsuarmi nunat pisuunerpaat 20-t, Hamburgimi isumaqatigiissuteqarput.

Tassanilu niuffaffiit ammanerunissaat nioqqutissallu eqqussukkat akiorneqarnissaat ilaatigut pineqarlutik.

Silallu pissusaanut aamma isumaqatigiittoqarpoq, taamaattoq tassani isumaqatigiinnginneq naqissuserneqarluni.

Tyskit nutaarsiassaqartitsiviat dpa aallaavigalugu, G20-t Paris-imi isumaqatigiissut tapersersorniaraat sukkasuumillu ilanngunniarneqartoq, isumaqatigiissummi allassimasoqarpoq.

Aammattaa USA-p isumaqatigiissummut tapersiinngitsoq allanneqarsimavoq.

- Parisi-imi isumaqatigiissummut pisussaaffilerneqarnerput uppernarsarparput, ilanngunneqarnissaali piaartumik sulissutigissavarput, isumaqatigiissummi dpa aallaavigalugu allassimasoqarpoq.

- USA isumaqatigiissummit peqataajumannginnerama oqaatigissavarput.

Merkelip oqaatigaa isumaqatigiinnginneq isumaqatigiissummi erseqqissarneqartariaqartoq.

Ukioq manna USA-p præsidentiata, Donald Trumpip, USA isumaqatigiissummut tapersiisinnaanngitsoq nalunaaruteqarsimavoq, naak nunat allat tamarmik franskit illoqarfiisa pingaarnersaani, Paris-mi 2015-mi isumaqatigiissutigisimangaluaraat.

Tamannalu pissutigalugu isumaqatigiissut atorunnaarsinneqarnissaa ernumassutigineqarsimavoq, kisianni nunat allat isumaqatigiissummut tapersiinertik attatiinnarpaat.

Merkelip tusagassiortunik katersortitsinermi nunat 19-nit Hamburgimi ataatsimeersuarnerani peqataasut isumaqatigiissutip atorunnaarsinneqarsinnaannginnera assut nuannaarutigalugu oqaatigaa.

Franskit præsidentiat, Emmanuel Macronip oqaatigaa decembarip ulluisa 12-ni Paris-imut silap pissusaanut isumaqatiginninniaqqinnissamut aggersaaniarluni.

G20-ni aqutsisut ulluni marlunni Hamburgimi ataatsimeersuariarsimapput, tassani nunat pisuunerpaat 20-it nunarsuatsinni apeqqutit annertuut eqqartorneqarlutik.

Powered by Labrador CMS