Silap pissusia aallakaatitsiffimmi pitsaanerpaami
Unnugu Zackenbergiliarit. Ilisimatusarfimmit aallakaatitassiaq DR1-imi aallakaatinneqassaaq - uuttortaanerit takutippaat Kalaallit Nunaat kiaguttoq
Silap pissusiata allanngoriartornera sammineqaqqilerpoq, tamatumunngalu ersarissumik takussutissaavoq Sermersuup aakkiartupiloornera.
FN-ip klimapanel-iata septembarimi nunarsuup qanoq innera pillugu nalunaarusiaq saqqummiutissavaa. Tamatumani ilaapput Zackenbergimi ilisimatusarfimmit uuttortakkat.
Aamma atuaruk: Sikuiuitsoq Avannarleq 2054-imi sikuerulluinnarsimassaaq
Aasaq manna issittumi inuilaajunerpaat kiassutsikkut rekordiliisarput. Qallunaat ilisimatuut ukiuni kingullerni 17-ini silap pissusiata ineriartornera Zackenbergimi Tunup avannaaniittumi, qaasuitsup killeqarfianit 800 kilometerinik avannarpasissusilimmiittumi, ilisimatusarfimmit malinnaaffigisimavaat. Piffissami tamatumani issittumi aasaq naatsoq kiatsikkiartuaartuarsimavoq, ukioq mannalu rekordiliilluni juulimi ulloq unnuarlu agguaqatigiissillugu 7 gradinik kiassimavoq.
DR1 peqataasimavoq qallunaat silap pissusianut ministeriata Martin Lidegaardip sapaatip akunnerani uani Zackenbergimiimmat ilisimatusarfillu pulaarlugu. Tamanna aallakaatitassiarineqarpoq unnugu programmimi 21søndag-imi takutinneqartussaq.