KL

DK

Silap allanngoriartornera pissutaalluni pitsaanerusumik upalungaarsimasoqartariaqarpoq

Silaannaap allanngoriartornera pissutaalluni Kalaallit Nunaanni inuussutissarsiornikkut suliaqartunut nammillernassaaq. Ajutoortoqassagaluarpat qanoq iliuuseqartoqarnissaa anguniarlugu allaanerusumik iliuuseqartoqartariaqarnera ilisimatuunit siunnersuutigineqarpoq, tassani sillimmasiinermut tunngasunut kiisalu ujaasinernut pitsaanerusumik suleqatigiittoqarnissaa pitsaanerulersinniarlugu siunnersuutit

Redaktionen

Ilisimatusarneq

Silap pissusiata allanngornerata kinguneri ukiorpaalunngulersuni tusartariileqaagut, kisiannili Kalaallit Nunaanni qanoq iliorluta allanngoriartuutinut naleqqussarsinnaanerput
eqqartungaassanagu.
Issittumi Siunnersuisooqatigiit ilisimatusartartunut Canadameersunut, Kalaallit Nunaanneersunut Danmarkiminngaanneersunullu nunarsuup issittortaata immikkoortuinut Kalaallit Nunaata kitaani Canadallu kangiani silap pissusiata allanngorneranut naleqqussarniarluni iliuuserineqarsinnaasunik innersuussuteqaqqullugit suliakkiuteqarsimapput.
Innersuussutit
Kalaallit Nunaanut tunngatillugu ilisimatusartartut suliassaqarfinni assigiinngitsuneersunik
suleqateqarlutik paasissutissarpassuarnik katersuipput, soorlu atortulersuutinut,
ilinniartitaanernut, aatsitassanut allanullu tunngassuteqartut paasissutissat katersorneqarlutik.
Taamaaliortoqarpoq ukiuni 2013-imiit 2016-ip tungaanut, maannalu suliat inernerannit
innersuussutit piareerneqarput. Inernerit innersuussutillu Nuummi sapaatip akunnerata tulliani saqqummiussorneqassapput, ataatsimiinneq Pinngortitaleriffimmi pissaaq marlunngorneq 11. septembarimiit 13. septembari ilanngullugu ingerlanneqassalluni.
Allaaserinnittoq
Pinngortitaleriffimmi ataatsimiinnissaq sioqqullugu ilisimatusartartut naluaarusiami ”Adaptation Actions for a Changing Arctic”-imi (Issittumi allanngoriartortumi naleqqussarnissamut
iliuusissat) suliaqaqataasimasut allaaserisaaqqanik ataatsimiinnissamut qilanaartuutitut Sermitsiaq.AG-mi ilanngussaqartassapput.

Qilanaartuummik ullumi allaaserinnittoq tassaavoq ilisimatusartartoq namminersortoq; Knud Falk.

Silarput silarlukkajunnerulissappat nalinginnaanngitsumiillu ingasannerusumik panernersuaqartarnerit pisalissappata aammalumi sermernarnerulissappat savaatillit nerukkaatissatut naatittagassaat aserorneqartalissapput, piniarnermik aalisarnermillu inuussutissarsiuteqartut inuussutissarsiorniarnerminni ajornartorsiornerulissapput, ukiunilumi kingulliunerusuni silap pissusianit peqquteqartumik pisartut nutaarsiassat saqqaanniittalernikooqaat. Silap pissusii taama ittut siunissami akulikinnerusumik pisalernissaat silap pissusiata allanngoriartornera Issittullu kiatsikkiartornera ilutigalugit silap suli sakkortunerusumik nikeralernissaa nillissuseq kissassuserlu, anori masannartuliortarnerillu suli sakkortunerusumik nikerartussanngornissaat ilisimatusartartunit naatsorsuutigineqarput. Tassa inuussutissarsiutitigut siuliini eqqaaneqartuni ajornartorsiornerulernissaq naatsorsuutigineqarpoq, qaqqani imaatigullu ajutoortarnerit amerlinerunissaannik kinguneqarsinnaasussatut aamma paasineqartariaqartoq. Taamaalisoqarnissaanullu – silapilussiornerusalernissatsinnut – sillimmartaarniarluta periarfissat assigiinngitsut aammalumi sillimaniarnerit pitsaanerusumik aaqqissuussat piareersimasuutigineqartariaqalissapput.

Inuussutissarsiutinik ingerlatsiveqarfiit silap pissusiata allanngorneranit sunnertiasuujusut assersuutigiinnarlugu pitsaanerusumik sillimmasiisarnernik aaqqissuussinikkut aammalumi ajunaarnersuaqarsinnaaneranut aningaasaateqarfimmik pilersitsereernikkut piareersaasiorfigineqarsinnaapput, qaqugukkut aaqqissuussat taama ittut atorneqarsinnaanerat erseqqissunik piumasaqaatitalersornerisigut. Pingaarnerusorli unaavoq silamik peqquteqartumik ajunaarnersuaqarnerani inuiaqatigiit inuussutissarsuitinillu ingerlataqartut tupatsitaasannginnissaat, kisiannili ajoquseerujussuarnernut allaallu isertitassaaruttoornermik kinguneqarsinnaasunik pisoqarnerani aningaasanik atugassiissutissanik piareersimasuuteqarnissaq upalungaarsarfigineqarsinnaammat.

Tassami silarlukkajunnerusoqalernissaanik ilimaginninneq eqquutissappat maanna ajunaarnersuaqarsinnaaneranik upalungaarsimanerup misiligarneqarluarsinnaanera ilimanaateqarluarpoq. Nunatta imartaani annaassiniartarnerit ataqatigiissarneqarnerinut Kalaallit Nunaanni Politimestereqarfik Issittumilu Sakkutooqarfik akisussaasuupput, aammali inuit angallataatillit imaani angalasut pisussaaffiligaapput ajutoortoqarnerani annaassiniaqataassallutik. Nunami innuttaasut taama siammasitsigalutik najugaqarfigisaanni imaani ajutoortoqartillugu aalisartut piniartullu misilittagartuut sallersaallutik annaassiniaqataagajuttarput. Illoqarfimmi nunaqarfimmilluunniit sumiikkaluartuni misilittagaqarneq sumiiffigisamillu ilisimaarinnilluarneq tuaviortumik angusaqaataalluartumillu ujaasinernut pingaaruteqartupilussuupput.

Taammaattumik eqqarsaatigineqarsinnaavoq inuinnaat kattuffiisa pisortallu sinerissap qanittuani aammalu nunap iluatigoortarfinni ujaasisarnernut tunngatillugu aaqqissuussaanerusumik maleruagassiukkamillu suleqatigiiffiliorsinnaanerat. Soorlu takorloorneqarsinnaavoq sumiiffinni taamatut ujaasisarnernik suliaqarsinnaasunik pisortanullu toqqaannartumik attaveqarsinnaasunik pikkorissaaqqinnikkut assersuutigalugu aalisartunik piniartunillu immikkut soqutiginnittunik inuttaligaasumik ujaasisartoqatigiinnik pilersitsisoqarsinnaanera. Tamatumani Røde Kors ilanngunneqarsinnaavoq Issittumi Ikiuiniarnermut tunngassuteqartuni pikkorissaasinnaallutik.

Nunavummi ́Canadian Rangers ́ Svalbardimilu ’Longyerbyen Røde Kors’ Issittoqarfinni aaqissuussinernut taama ittunut assersuutissaapput.

Nalunaarusiap imarisai pillugit Nuummi innuttaasunut Pinngortitaleriffimi marlunngorneq 11. september
2018 nal. 19-21 ataatsimiititsisoqassaaq.

Læs hele sagen:

silap pissusaa avatangiisillu inuiagatigiit
Powered by Labrador CMS