luftfart
Silaannakkut angalanneq Kajumissaarut: Nuummi mitarfik tallinasiuk
Maanna Nuummi mittarfiusup tallineqarnissaa isumassarsiatsialaanngilaq. Timmisartut atorunnaariartuaartut aallaaviginagit, siunissami timmisartussat eqqarsaatigalugit mittarfiliortoqassaaq. Taama Sermitsiami atuartartut allaaserisaat nipeqarpoq.
Nuummi mittarfiup 2200 meterinut tallineqarnissaanut maanna pilersaarutaasut pitsaasumik nassataqarnavianngillat.
Taama illussanik titartaasartoq Sermitsiami kingullermik saqqummersumi atuartartutut alakkamini allappoq.
Tikikkuminassusaa appasippallaartoq
Taassuma isumaa naapertorlugu timmisartut taamaatsiinnartut amerlavallaat nunarsuarmioqatigiillu aalajangersagaannut atatillugu utaqqisoqarpallaartarnera tamatuma nassatarissavaa.
Nuummi mittarfik tallineqarpat navianarpallaassaaq
Tikikkuminassuseq 93 procentip missaaniissasoq taanna allappoq, ICAO-llu (nunarsuarmioqatigiit inuinnarnut timmisartuussinermut kattuffissuat, aaqqiss.) tikikkuminassuseq 98 procent kaammattuutigaa.
Peter Barfoedip allaaserisamini ilanngullugu siunissami mittarfiulerumaartussaq 2200 meterinik takissuseqartoq ungasinnerusoq isigalugu naappallaassasoq allaaseraa.
Timmisartut avatangiisinut qajassuartut mittarfimmik tannerusumik pisariaqartitsipput
Siunissamimi timmisartut avatangiisinut qajassuarnerunissaannik sakkortunerusumik piumasaqalernikkut, timmisartorsuit ilaasunik usinillu killilerneqanngitsunik nassarlutik missinnaaneranni mittarfik minnerpaamik 3000 meterinik takissusilik pisariaqartinneqassaaq.
- Mittarfiliorniaraanni timmisartut atorunnaarsikkiartorneqartut eqqarsaatiginagit, timmisartut ukiualuit matuma kingorna atorneqalerumaartussat eqqarsaatigineqartussaapput, Peter Barfoed atuartartutut allaaserisamini allappoq.
Peter Barfoedillu isumaa naapertorlugu mittarfiup naappallaarnerata Nuup nunarsuup sinnerani ingammik takornarianut inuussutissarsiortunullu tunngatillugu soqutigineerunnissaa kingunerissavaa.
Angisunnguami sanagitsi
Peter Barfoedip isumaa naapertorlugu Nuup avataani 8 kilometerisut ungasitsigisumi Angusunnguami mittarfiliortoqartariaqarpoq, taannalu immap iluatigut aqquserlugu Nuummut attavilerneqassaaq. Tamaanilu mittarfik 3000 meterisut takitigisoq inissaqarpoq.
Nuup maanna mittarfia 950 meterinik takissuseqarpoq.