Nuuk
Sila pissutaalluni arpatitsinissaq kinguartinneqarpoq
Silap unerisimannginnera pissutigalugu Nuummi arpatitsinissaagaluaq Kang Nu Running Race sapaatip akunnerata tullianut kinguartinneqarpoq
Nuummi arpatitsineq soqutigineqarluartoq sakkortoorlu Kang Nu Running Race arfininngorpat tullianut ingerlanneqartussanngorlugu nuutsinneqarpoq.
Aqqutaani sarajattoqarsinnaanera pissutigalugu nuutsinneqarpoq.
Navianarsinnaasoq
- Arfininngorpat siallerlunilu anorlissangatinneqarpoq. Taamaattumik unammisitsinissaagaluaq kinguartinneqarpoq, tassami aqqutaa peqataasunut navianarsinnaavoq sarajattoqarsinnaanera pissutigalugu, aaqqissueqataasoq Jens Kristian Berthelsen oqarpoq.
Peqataasussanut ataatsimiisitsisoqarnerani tamanna ilisimatitsissutigineqarpoq.
Peqataasorpassuit
- Inuit 270-t peqataanissaat naatsorsuutigaarput. Peqataaniaraanni sisamanngorpat allatsereersimasariaqarput. Aamma silap sapaatip akunnerata tulliani pitsaanerunissaa ilimagineqarpoq, Jens Kristian Berthelsen oqarpoq.
Peqataasunut ataatsimiisitsisoqaqqissaaq sisamanngorpat.
Martin Møller angutini ukioq kingulleq ajugaavoq, arnani Niviaq Chemnitz Berthelsen ajugaasuulluni.