Sikut assiliortornerisa nutarterneqarnerat isumannaannerulersitsisoq

Tassami qaammataasamit ullormut assilisat Kujataani imaatigut angallannermi isumannaatsuuneq maannamit qaffanneqassaaq.

Danskit nukissiornermut, pilersuinermut silap pissusianullu ministeriaqarfia tusagassiuutinut nalunaarummi allappoq.

Taakkununnga ministerip, Lars Chr. Lilleholtip, teknologi nutaaq nersualaarpaa.

- Isumannaallisaanerup maanna kujataata imartaani angalasunut qaffasinnerulernera nuannaarutigisorujussuuara. Inuussutissarsiornermut aamma takornariaqarnermut annertuumik sunniuteqarpoq. Tamatuma saniatigut paasissutissanik qularnaatsunik amerlanerusunik pissarsivugut, qaammataasat silamik apeqqutaatitsinnginnamik aamma taartumi atorsinnaagamik, taanna tusagassiuutinut nalunaarummi allappoq.

Timmisartortarnerit taamaatittut
Sikup ingerlaarneri siornatigut sapaatip-akunneranut marloriartarluni qulimiguulimmik DMI-p Narsarsuarmi immikkoortoqarfianit pisaraluarpoq. Kisianni silap allanngorartarnera pissutaalluni, tamatigut qangattarsinnaasarsimanngilaq.

Maannami DMI-p sikunik assiliartalersuisarnera sukkasuumik pisalissaaq, qaammataasami assit ullormut arlaleriarlutik takkuttassammata. Qaammataasat nuissat aamma taarnera apeqqutaatinnagu pitsaasunik assiliisarput.

Nuissat taartut akimorlugit assiliisinnaasoq
Taamaalilluni qaammataasatigut teknologi atorlugu umiarsuit takornariartaatit amerliartortut isumannaatsuunerat siuarsarneqarpoq, ukiuni makkunani tamakku nunatta kujasinnerusortaani imartatigut angalasarput.

Kalaallit Nunaanni sikut inissisimaffiisa nakkutiginissaa teknikkikkut periarfissaavoq, naalagaaffeqatigiit qaammataasanut arlalinnut atuisinnaalernikuummata, ilaatigut nunat tamalaat EUMETSAT, ESA allallu suleqatigalugit.

Ukiuni kingullerni qaammataasanit assit pitsaanerulernikuupput. Assersuutigalugu silaannarsuarmit umiatsiaaqqatut angissusillit takuneqarsinnaallutik. Taanna atortoq kujataani sikup assiliartalersorneqarneranut atorneqartarpoq.

Tamatuma saniatigut qaammataasani radarilinnik peqalerpugut, tamatuma sikut taartumi aamma nuissat akimorlugit takuneqarsinnaalersippaa.