ataatsimeersuarneq
Siku aakkiartortoq piviusunngulerpoq
FN-ip silap pissusaa pillugu Parisimi ataatsimeersuarnissaannut atatillugu sikumik Nunatsinneersumik aakkiartortumik eqqumiitsuliatut ivertitsinissamut Franskit oqartussaat kiisami akuersipput
- Akuersissut pissarsiaraarput. Kisianni Place de la Républiquemiinnani Place du Pantheonimiissaaq, sikuminersuit angisuut tassunga ilissavagut. Pilersaarutaasumik weekendimi ilineqartussaagaluit, decemberip pingajuata unnuaani ilissavagut. Kisianni piareerneqarumaarput.
Kuupik Kleist Greenland Group Aps piginneqataasoq oqiliallaqqasoq taama oqaluttuarpoq, taanna Royal Arctic Linemi piginneqataasut peqatigalugit sikut angisoorsuit aqqaneq-marluk 100 tonsimik oqimaassuseqartut Nuup Kangerluani katersorneqarnerinut isumaginnippoq.
Ataatsimeersuarneq
Taassuma kingorna siku containerinut qerititsivinnut ikillugu Danmarkimut assartorneqarpoq, tassanngaanniillu Parisiliaanneqarluni. Tassani FN-ip silap pissusia pillugu ataatsimeersuarnerani sapaatiuppat aallartittussami, eqqumiitsuliatut silaannaap kissatsikkiartortup nunarsuaq qanoq sunerneqarneranik takusassiatut ilineqassapput.
Islandimiup eqqumiitsuliortut Olafur Eliassonip aamma Minik Rosingip eqqumiitsuliaq isumassarsiaraat, taakku siornatigut Københavnimi Rådhuspladsip saavani aamma taamatut minnerusumik takussutissiinikuupput.
Nalorninartoq
Eqqumiitsuliamik suliaq suliarineqarsinnaassanersoq ippassaq tikillugu annertuumik nalorninartorsiortoqarpoq. Parismi pinerliisoqarnerata kingorna, FN-ip ataatsimeersuartitsineranut atatillugu silami aaqqissuussinissat tamaasa franskit nunanut allanut ministeriata taamaateqqummagit.
Taamaattorli sikuminersuit Nunatsinneersut asuliinnaq kilometerit tusindilikkaat angallanneqannginnissaasa qulakkeernerat iluatsinneqarpoq.
- Pingasunngorpat unnukkut nalunaaqutaq qulinut sikut iliorarlugit aallartissaagut, aqaguanilu ullaap tungaani piareersimaniartussaassallugit, Kuupik Kleist oqaluttuarpoq.
Place du Pantheon latinerit aqqusernannik taaneqartartumi inissisimavoq. Illorsuartaa oqaluffiusussatut naatsorsuussaasimagaluarpoq, taamaattorli franskinut tusaamasanut 76-nut mausoliumitut atulerpoq, ilaatigut Alexandre Dumasimut aamma Voltairemut.