SIK: Urani iluaqutaali

Sulinermik inuussutissarsiuteqartut kattuffiat SIK – Sulisitsisut Peqatigiiffiata ataasinngornermi qineqqusaarnermut akulerunneratut- qineqqusaarnermut maanna akuleruppoq.

SIK-p akulerunnermini Inatsisartunut qinersinissamut politikerinut assigiinngitsutigut kaammattuuteqarpoq. Soorlu uranimut tunngasumik.

- Namminiilivissagutta ullumikkornit sapiissuseqarnerulluta siammasinnerusumik annertunerusumillu anguniagaqarluta eqqarsartariaqalerpugut, Sulinermik Inuussutissarsiuteqartut Kattuffianni SIK-mi siulittaasoq, Jess G. Berthelsen taama oqarpoq.

Taanna isumaqarpoq urani oqallisigisinnaasariaqaripput paquminartunngortinnagu.

- Uranimut tunngatillugu ersarissuliortoqarusunngimmat uanga er-sarissuliussaanga. Kuannersuarni maannakkut aatsitassanik qaqutigoortunik tunisassiorniarnerup uranisiornissamut saatinneqartuarnera SIK-mi qatsulluinnarparput. Aatsitassanuku qaqutigoortut tunisassiariniarneqartut, taakkuli aatsitassat qaqutigoortut uranimik akoqarput, aatsitassanillu qaqutigoortunik tunisassiorniarnitsinni urani ilanngullugu qaqereeratsigu, taava sooq saniatigut iluaqutiginiassanngilarput ? Qanoq takorluuisoqarami assaateqqissagigut?, Jess G. Berthelsen aperivoq.

- Nunatsinni uraneqarpoq – nuannarigutigu nuannarinngikkutsiguluunniit, Jess G. Berthelsen ilassusiivoq.

SIK: Urani atorlugu nunarput/nunarsuarput qorsooqqinnerulersitsigu
SIK isumaqarpoq urani nunatta pisuussutaatut isigalugu nunarsuarmioqatitsinnut akisussaaqataalluta iluaqutissanngortillugu atorluartariaqaripput.

- Kuannersuarni sulisussat isumannaannerpaamik sulisinneqarnissaat SIK-minngaanniit isumaginiartussaavarput. Tamanna qulakkeerniarlugu Canadami suleqatissarsiorsimavugut. Isumaqarpugut Canadami isumannaallisaanermik suliaqartut Naalakkersuinikkut suleqatigissallugit piukkunnarluinnartut. Taakkumi ukiorpassuit tassa 1956-miilli, uranimut tunngatillugu suliaqarsimapput, sunalu suliarinerlugu ilisimaareqqissaarlugu, Jess G. Berthelsen tikkuaavoq.

- Kuannersuarni uranip akua ajoraluartumik annikeqaaq, tassa 0,34%-iugami, Canadamilu 20%-mik akoqarluni. Uranillu akua annikeqimmat aningaasarpassuarnik isaatitsissutigineqarsinnaanera qularnaraluartoq isumaqarpugut imminut akilersinnaasoq, naak, Canadamiinnitsinni paasigaluarlutigu uranip akua taama annikitsigisoq Canadami aatsitassap eqqagassartaatut isigisaraat, Jess G. Berthelsen oqarpoq.

- Taamaattumik SIK isumaqarpoq uranimineralak piinnarlugu nunatta ineriartortinneqarnissaa unitsinneqarsinnaanngitsoq! Unitsinneqassappat akisussaaffeqanngitsuliornerussaaq, Jess G. Berthelsen oqarpoq.

Sulinermik Inuussutissarsiuteqartut Kattuffiannit aamma isumaqarput nunatsinni inatsisitigut suliffeqarfinnut pisussaaffilersuinikkut sillimaniarnermut tunngasuni piumasaqaateqarnikkut, innuttaasut akuutinneqarnissaannut, ilinniartitaanermullu tunngasunik aaliangersaanikkut immitsinnut illersorsinnaasugut.