akitsuutit
SIK-mit sukkunut akitsuusiineq saassunneqarpoq
Ilumoorsinnaanerluni meeqqaniit pissakinnerusuniit juullilersorsuaq mamakujuttunik tillinneq? Sulisartut kattuffiat aperivoq
Inatsisartut ukiaanerani ataatsimiinnerminni akuersissutigisaat, tassa mamakujunnut aammalu sukkulinnut allanut akitsuutinik qaffaasoqarnera, Sulisartut Kattuffiata SIK-p ajunngitsumik oqaasissaqarfiginngilaat. Sukkulinnut akitsuusersuineq ilaatigut nunatta karsianut imassaaleqisumut isertitsissutaasapput.
Atuaruk: Aningaasanut inatsit mamaatsoq
Equngasumik eqquisoq
- Mamakujuttullu akii utsersortutut qaffariarujussuarput. Akitsuutinik akileraarutinut taarsiullugit atuutilersitsineq tamatigorluinnaq inuuniarnikkut equngasumik eqquisarpoq, tamannalu piffissamut sikitsuinnarmut eqqarsarneruvoq nunap karsianut imassaaleqisumi matussusiiniarneq kisiat eqqarsaatigalugu, SIK-p siulittaasua Jess G. Berthelsen tusagassiorfinnut nalunaarummi oqarpoq.
Meeqqanik tillittutullusooq
- Akitsuutinik atuutilersitsineq inuiaqatigiit akornanni innuttaasunik pissakereersunik eqquisumik sornarluinnartuuvoq. Maanna juullilersumi mamakujuttunik akitsuusiineq assersuunneqarsinnaavoq meeqqaniit piitsuniit mamakujuttunik tillinnertut, tamatumalu politikerit qarngisa iluanni mamaatsoornartorujussuussagaluarpoq, taanna erseqqissaavoq.
SIK-mi siulittaasup aamma erseqqissarpaa, tamatumunnga taarsiullugu akileraarutit qaffaqqugaluarlugit, akitsuusersuinerminngaanniit inuiaqatigiinni naligiisitsinerussagaluarmat.
Kingumoortumik atuutilertut
Jess G. Berthelsenip aamma erseqqissaatigaa, mamakujuttunut akitsuut kingumut atuutilertussanngorlugu eqqunneqartoq, pisiniarfinnillu akinik qaffaasunik eqquilluni. Tamatumalu kinguneraa pisisartut eqqorneqartut.
Atuaruk: Mamakujuttunut akitsuut marloriaatinngussaaq