kommunit avinneri

SIK: Qaasuitsup Kommuniani sulisut pissusiluffigineqarput

Qaasuitsup Kommunia sulisut Ilulissaniit Aasiaannut nuunnissamut akuersaarsimasut illaruaataallutik misigisimasut, SIK-p siulittaasuata Jess G. Berthelsenip oqaatigaa.

Jess G. Berthelsen
Jess G. Berthelsen er ikke imponeret over Qaasuitsup Kommunias arbejde i forbindelse med delingen af kommunen

Qaasuitsup Kommuniani sulisut 21-it – kommunip avinneqarnissaanut atatillugu – atorfitsik pigiinnarusukkunikku Ilulissaniit Aasiannut nuullutik Kommuneq Qeqertalimmi sulilernissaannik neqeroorfigiteqqammerput.

Sermitsiaq.AG-p allaaserisimavaa, Qaasuitsup kommuniani sulisut aqqanillit nuunnissaq itigartitsissutigisimagaa, sulisullu sisamaannaat Ilulissaniit Aasiannut nuunnissaq akuersaarsimagaat.

Atuaruk: Qaasuitsup Kommuniani sulisut aqqanillit nuukkusunngitsut

Sulinermik inuussutissarsiuuteqartut kattuffia SIK tusagassiuutinut nalunaarummi allappoq, ilaasortat arlallit suliffeqaannarusukkamik neqeroorut ilassivaat, taamalu Aasiannut nuunnissaminnut akuersillutik – naak Ilulissaniiginnarusukkaluarlutik.

Sulisullu Ilulissaniit Aasiannut akuersisimanngitsut, Avannaata Kommunia atorfininnissamik neqeroorfigitissimapput, tamannalu Jess G. Berthelsenip SIK-mi siulittaasup eqqumiiginartoqartippaa.

Atuaruk: Sulisut nuunneqarnissaat pillugu apeqummi Ane Hansenip Qaasuitsup Kommunia isornartorsiorpaa

- Aajunali nuanniitsua: Ilaasortarpassuavut suliffeerunniannginnamik pinngitsaalineqartutut misigisimallutik Kommune Qeqertalimmut nuunnissaminnut akuersipput. Maannalu uukapaatinneqarsimasutut misigisimapput, ima eqqarsalerlutik: Akuersisimassanngikkaluarama, taava Ilulissaniiginnarsimassagaluarpunga. - Tupinnanngitsumik maannakkut illaatigineqartutut
misigisimapput, Jess G: Berthelsen oqarpoq.

Atuaruk: Palle Jerimiassen: Sulisut soraarsiinnarsinnaanngilagut

Kommunillu avinneqarnissaanut Qaasuitsup Kommunianit suleriaaserineqartoq tupaallaatiginngilaa.

- Qaasuitsup Kommuniata kommunip avinnissaanik suliarinninnera paatsiveerunnarpoq, pilersaarusiorluarnerusimanissarlu kissaatiginaraluarpoq. Soorlu SIK-mi isumaqarpugut kikkut kommuninut nutaanut marlunnut inissinneqarnissaat qangali
aalajangerneqarsimasariaqaraluartoq, maanna aatsaat piffissaq kingullerpaaq atorlugu taamaaliornani. Taama sivisutigisumik utaqqisinneqarneq sulisunut erloqinartuuvoq.

- Soorlu kommunip sulisut pineqartut paasissutissilluarnerusimasariaqaraluarpai kommunimut nutaamut nuunnissamik neqeroorut akuerigaanni naaggaaraanniluunniit tamanna qanoq kinguneqassanersoq. Taamaappoq aamma siunissami ineqarnissamut tunngatillugu paasissutissilluarneqarnerunissaq eqqarsaatigalugu, Jess G: Berthelsen oqarpoq.

Powered by Labrador CMS