sulisartut tikisitat

SIK-p siulittaasua: Assigiinngisitsineq atugaaqaaq

Jess G. Berthelsen isumaqarpoq sumi inunngorsimaneq malillugu akissaasersuineq uumigineqaqisoq atugaaleqqissimasoq. Ilassutitut isumaqatigiissutitigut tikisitat pingaarnerutinneqartarput

Jess G. Berthelsen
SIK-p siulittaasua Jess G. Berthelsen

Sulinermik inuussutissarsiuteqartut kattuffiata ukiunik 60-inngortorsiornera ilisimaneqartutut innuttaasut ataatsimiinnerannik ´Qassimiuaarnermik´ nalliussineqarpoq.

Oqaluuserisassaaleqisoqalissappallu kattuffiup ukiut 25-t sinnerlugit siulittaasua Jess G. Berthelsen sunik tamanik saqqummiussaqartarpoq.

SIK-p siulittaasua AG-mut pingaarnerpaatillugu oqaatigaa, sumi inunngorsimaneq tunngavigalugu akissaasersuineq uumigineqaqisoq, sulisartunik nunaqavissunik tikisitanillu akissarsiatigut assigiinngisitsisoq, atugaaleqqissimasoq - assigiinngisitsinerup uumigineqaqisup atorunnaarsinneqarnissaanik politikkikkut aalajangiisoqarnera ukiut 25-t qaangiutereersut.

Tikisitanut iluaqutaasut

– Taamanikkut Inatsisartut aalajangiipput sumi inunngorsimaneq tunngavigalugu akissaasersuineq ukiut arfinillit ingerlaneranni atorunnaarsinneqassasoq. Maanna takusinnaavaarput aalajangiineq tamana saneqqutaarneqartoq nammineerussamik isumaqatigiissutitigut, tamakkua sulisartunut tikisitanut iluaqutaasumik isumaqatigiissutigineqartarmata.

– Isumaqatigiissutinut atuutereersunut ilassutitut isumaqatigiissuteqarnissaq tunngaviatigut akerlerinngilara, dtamanna nunaqavissunut tikisitanullu assigiissumik iluaqutaappat. Isumaqatigiissutinili tamakkunani tamanna takusinnaasimanngilara, taanna AG-mutd oqarpoq.

Inatsisartut iliuuseqartussaapput

Tamanna peqatigalugu isornartorsiorpaa atorfinnut qaffasissunut arlalinnut atorfeqarnermi atugassarisanik isumaqatigiinniuteqarnerit qallunaat kattuffiinit ingerlanneqartarnerat.

– Eqqarsaatigaakka akademikerit atorfiillu qaffasissut allat. Takorloorneqarsinnaavoq illaruaatigineqassasugut Danmarkimi isumaqatigiinniarnerit qallunaat kattuffii qulaallugit tiguniassagaluarutsigit. Pissusissamisuunngilluinnarpoq qallunaat kattuffii Kalaallit Nunanni akissarsianut isumaqatigiinniuteqartarnerat, Jess G. Berthelsen oqarpoq.

Allaaserisaq tamaat AG-mi atuaruk, taannalu ullumi pisiniarfinni pisiarisinnaavat, Aviisi aamma pisiarisinnaavat uani:

Powered by Labrador CMS