Pituffik
SIK-p isornartorsiuinera eqqunngitsuusoq Greenland Contractorsimit oqaatigineqarpoq
Pituffimmi nunaqavissut qanoq amerlatigisut sulisarnersut oqallisigineqarpoq
Pituffik pillugu SIK-mi siulittaasoq Jess G. Berthelsen akuleruppoq.
'2008-miilli Pituffimmi nunaqavissunik sulisoqarnikuunngitsoq ilinniartunillu naammasititsinikuunngitsut' uppernarsaatilernagu SIK-p siulittaasuata oqaatigaa.
- Greenland Contractorsip Pituffimmi kiffartuussinissamik isumaqatigiissummik annaasaqarnerata annertuumik oqallisigineqarnerani, kalaallinit suliffigineqartut qasserpiaanersut ilanngutissallugu pissusissamisoorpoq. Greenland Contractorsimit oqaatigineqarpoq Pituffimmi kiffartuussinissamik isumaqatigiissut Kalaallit Nunaannut pingaaruteqarluinnartuusoq, ingammik nunaqavissut suliffissaat ilinniartullu sungiusarfissaat 500-t eqqarsaatigalugit, SIK-p siulittaasua oqarpoq.
- Taamatulli oqartoqarnera piviusumut naapertuuteqqissaanngilaq, kalaallimimmi nunaqavissumik Pituffimmi 2008-imili atorfinitsitsisoqarsimanngilaq, Jess G. Berthelsen kisitsisinik uppernarsaateqarnani tusagassiutinut nalunaarummi allappoq.
Greenland Contractorsip paasisinnaanngilaa
Jess G. Berthelsenimit oqaatigineqartut Greenland Contractorsimit paasiuminaatsinneqarpoq.
- Ukiunilu arfineq pingasuni ingerlareersuni, minnerpaamik 50-it naliginnaasumillu 100-ut kalaallit sulisuusarttu, taakkuali iluani 25-it sulisuusartut ilinniartut, maannakkulli 20-it ilinniartuupput, Greenland Contractorsimi siulittaasup tullia Steffen Ulrich Lynge Radioavisimut oqarpoq.
Sulisorineqartuni 400-sut sisimararterutaat nunaqavissuusut ilisimatitsissutigaa.
- Kikkunnulluunniit suliffik taanna ammavoq. Kisianni massakkorpiaq inissisimaneranut peqqutaasinnaavoq, ilinniagaqartut ilinniagaqarluarsimasut sulisorisaramikkit, Greenland Contractorsimi siulittaasup tullia KNR-imut oqarpoq.
Ameriarmiut suliffeqarfiat Vectrus Pituffimmi kiffartuussinissamik isumaqatigiissut tigussavaa oktobarimi. Greenland Contractorsip Pituffimmi sulineq ingerlatarigaluarpaa.