SIK-p inuusuttai
SIK-p Inuusuttai: Nunarput Danmarkimut periutsinut assinguniarpallaarluni ingerlavoq
Canada aamma Islandi suleqatigineqarnerusariaqartut SIK-p inuusuttaanit siunnersuutigineqarpoq
SIK-p Inuusuttai isumasioqatigiipput sisamanngornermit arfininngorneq ilanngullugu, tassani ukioq ataaseq pioreernerminni killiffitsik peqatigiiffittullu siunissami anguniagassatik suliassatillu eqqartorlugit.
Kalaallit Nunaata namminersulivinnissaa suli ungasittoq inuusuttut peqatigiiffiannit oqaatigineqarpoq.
- Nunatsinni pissutsit eqqartorneranni tikinneqartut ilagaat nunarput Danmarkimut periutsinut assinguniarpallaarluni ingerlasoq. Taamatullu ingerlatseriaaseqarnerup ilaatigut kingunerigaa nunatta inuisa nunaminni takornartatut misigilersarnerat. Pissutsit tamakku kinguneraat ilinniartitaanikkut suliffeqarniarnikkullu Kalaallit Nunaat nunanut naleqqersuuffigisartakkaminut suli kinguarsimaqaluni inissisimammat, SIK-p Inuusuttaasa siulittaasuat, Aani Reimer, tusagassiutinut nalunaarummi oqarpoq.
Island Canadalu suleqatiginissaat
SIK-p Inuusuttaasa Inatsisartunut qinersinissamut qineqqusaartunut kaammattuutigerusuppaat nunatsinni ineriartornerup kalaallinut naleqqunnerusumik iluseqartup sulissutigineqarnissaa.
- Danmarkip tamatigut aqqutigineqarlunilu assiginiartuarneqarnera kalaallit pilertornerusumik namminiileriartornissaannut iluaqutaanersoq apeqqusersorneqartariaqarmat, SIK-p inuusuttaanit oqaatigineqarpoq nangillutillu:
- Nunat qanigisatta allat soorlu Islandip Canadallu ilinniakkatigut niuernikkullu suleqatissatut attavigilernissaat pimoorunneqarnerusariaqarpoq.