Kommune Kujalleq
SIK-p immikkoortoqarfia pujortarunnaaqqusineq pillugu ujartuisoq
Januaarip aallaqqaataani Kommune Kujallermi sulitilluni pujortartoqartarunnaassaaq. Kisianni SIK-p Qaqortumi immikkoortoqarfia, QSIP, inerteqquteqalernissaq pillugu paasitinneqarsimanngilaq.
Kommune Kujallermi sulisut, atuarfinni, paaqqinnittarfinni, utoqqaat illuini aamma sunngiffimmi ornittakkani sulisut, sulitillutik januaarip aallaqqaataani pujortaqqusaajunnaassapput.
Kisianni sulinermil inuussutissarsiuteqartut immikkoortoqarfiat, QSIP Sinniisoq, kommunimut ammasumik allagaqarnermini allappoq, pujortaqqusiunnaarnermut ilisimatitsissummik pisimanatik.
- Piffissami qaangiuttumi saaffigineqarnissamik ilimasulluta utaqqivugut, taamaattorli minnerpaamilluunniit qulequtaq pillugu ilisimatinneqarnata. Kommune Kujallermi sulisunik ilaasortarpaaloqarpugut taamaattumik aamma taakku eqqartorneqartussat minnerusumik annerusumilluunniit sullissaraarput suliffiup peqqinnartuunissaanik, QSIP Sinniisoq, ammasumik allakkami taama allappoq.
Atuaruk: Kommune Kujallermi sulitilluni pujortartoqartarunnaassaaq
- Sulisartut ilaasortavut illersugassavut eqqarsaatigalugit maannagaaq anguniakkamut tapersersornartumut suleqataallutalu oqaloqataarusunnerput paasitikkusupparput, tamattami peqqissuunissatta anguniarnissaa soqutigisaraarput. Sulisunut sinniisut pisariaqartippaat oqaloqataanissartik, kiisalu suleqatiminnik sullissinissaminnut sakkussaqartariaqarput, QSIP Sinniisoq oqariartuuteqarpoq.