aalisarneq pillugu oqallinneq
SIK: Lyberth aamma ajunngitsuliorpoq
Sulinermik inuussutissarsiuteqartut kattuffiat SIK isumaqarpoq Karl Lyberth naalakkersuisutut tunuartigani pitsaasumik iliuuseqartoq
Qaleralinniarnermi qaammatikkaartumik pisassiisalernikkut avannaani tunisassiorfinni sulineq aalaakkaanerulissaaq. Sulinermik inuussutissarsiuteqartut kattuffiat SIK taama isummerpoq aalisarnermut, piniarnermut nunalerinermullu naalakkersuisutut tunuarlaaq Karl Lyberth nersualaarlugu taannami tunuartigani qaammatikkaartumik pisassiisarnermi ukiortaamiit atuutilersitsivoq.
Umiatsiaararsorluni qaleralittassat 2013-mi paggatassiissutaanerat avannaani aalassassimaarutaavoq pisassiissutit aggustiuliinnartoq tamakkerneqarmata. Taama pisoqarpoq kvartalikkaartumik pisassiisarneq IA-kkut ukioq tamaat aalisarsinnaanissaq qulakkeerniarlugu atuutilersitaat atorunnaarsinneqarmat. Maanna ukiortaamiit qaammatikkaartumik pisassiisoqartalerpoq.
Tom Ostermann
- SIK isumaqarluinnarpoq qaammatikkaartumik qaleralinnik pisassiisarneq eqqunneqarluinnartariaqartoq, tamatumami kingunerissammagu ilaasortagut ataavarnerusumik ukioq kaajallallugu isaatitaqalissasut, taannaannaanngitsoq kommuunerujussuit aningaasanik sipaassapput, aammalu Namminersorlutik Oqartussat aningaasanik sipaaruteqassallutik. Taannaannaanngilaq aammali Kommuunerujussuit akileraarutitigut isaatitsinerat annertunerulissaaq, SIKp siulittaasua Jess G. Berthelsen oqarpoq.
Qaleralittassat tamakkerneqaraangata SIKp ilaasortai suliffissuarniit angerlartiinnarneqartarput. Pisassat nungunnginneranni aalisartut isertitassatut naatsorsuutigisatik pissarsiarisarpaat aalisarnerli unikkaangat sulisartut annaasaqartarput.
- SIK-mit qatsulluinnarparput ilaasortatta pilliutigineqartuarnerat, Jess G. Berthelsen oqarpoq.
Taamaattoq Naalakkersuisut nersualaarneqanngillat Aleqa Hammondip inooqataata Tom Ostermannip Karl Lyberthimut siunnersortinngoraluarnera pillugu.
SIK har dog ikke noget ros til Naalakkersuisut i forbindelse med ansættelsen af formanden for Naalakkersuisut Aleqa Hammonds samlever Tom Ostermann som rådgiver for Karl Lyberth.
- Isumaqarpugut tamanna aammattaaq Naalakkersuisut siulittaasuata akisusussaaqataaffigilluinnaraa, SIKp siulittaasua oqarpoq.