akiliisinnaajunnaarneq

SIK: KNT-p akiliisinnaajunnaarneratigut sulisut 140.000 koruuninik pissaqarput

SIK-mut ilaasortat arfinillit akissarsiassaasa tunniunneqarnissaat pillugu sulisartut kattuffiat Lønmodtagernes Garantifondimut saaffiginninniarpoq

Ukioq manna avaleraasartoorniarnermut atatillugu KNT assortuussutaasunik pisassinneqarpoq. Pisassiissutilli selskabi akiliisinnaajunnaarnissaanit annaassinnaasimanngilaat

Aalisarnermik selskabip KNT-p qanittukkut akiliisinnaajunnaarnerata kingunerisaanik Niaqornani SIK-mut ilaasortat arfinillit akissarsiassatik katillugit 140.000 koruunit tigusimanngilaat.

Taamatut KNR-mut paasissutissiivoq sulisartut kattuffiata SIK-p siulittaasua Jess G. Berthelsen.

Garantifond

Akiliisinnaajunnaartoqartillugu sulisartut akissarsinissaat qulakkeerneqartarpoq Danmarkimi Lønmodtagernes Garantifondimit. Sulisartullu kattuffiata ilaasortat arfinillit sinnerlugit qinnuteqaatit suliarileruttorpai.

– Aningaasat tassaapput sulisimagaluarlutik akissarsiassaat tunniunneqarsimanngitsut. Tamannalu uppernarsaatissaqartipparput. Akissarsiat allagartaat tamaasa pigaavut, taamaattumillu qularinngilluinnarparput KNT ilaasortatsinnut taama amerlatigisunik akiligassaqartoq, Jess G. Berthelsen KNR-mut oqarpoq.

Powered by Labrador CMS