SIK: Kanngunaqaaq Mette Lynge!

– Ineqarnermut Naalakkersuisoq Mette Lynge ileqqorissaarnermut tunngasumik aamma sakkortuumik tikkuussivoq ilaqutariit Namminersorlutik Oqartussat inissiaataannut inisseqqinneqartartut qanoq pineqqarnissaannut tunngatillugu. Uanga isumaga malillugu tamatumani pineqarpoq ajornerpaamik assigiinngisitsineq, SIK-p siulittaasua Jess G. Berthelsen oqarpoq.
Aamma atuaruk: Angerlarsimaffeqanngitsut qitornaat nooqattaartinneqarput
Aamma atuaruk: Manna pillugu inuit angerlarsimaffeeruttarput
Taassuma tupigusuutigaa Mette Lyngep inatsisartunut ilaasortamut Palle Christiansenimut, Demokraatit, akissummini taanna ilalermagu inisseeqqittarfinni malittarisassat sakkortusineqarnissaannik siunnersuut pitsaasuusoq. Assersuutigalugu pujortaqqusiunnaarneq imeqqusiunnaarnerlu:
– Naalakkersuisut A/S Inissiaatileqatigiiffik Ini peqquniarpaat malittarisassanik taamaattunik eqqusseqqullugu. Oqaatigineqassaarli inissiat inisseeqqittarfiit paarsisoqarnatillu nakkutilliisoqanngimmata, Mette Lynge Palle Christiansenimut akissummini allappoq.
– Akissut taanna naalakkersuisooqatigiinnissamik isumaqatigiissummut naapertuutinngilaq, tassani naalakkersuisut siunniummassuk innuttaasut pisariaqartitaat malillugit assigiissumik atugassaqartitsilernissaq, SIK-p siulittaasua Jess G. Berthelsen oqarpoq nangillunilu:
– Nangillugu atuarneqarsinnaavoq naalakkersuisooqatigiinni kissaatigineqartoq tamanna ingerlanneqassasoq inuiaqatigiit siunissamut isumalluartut peqatigalugit nutaaliorusussuseqarneq nammineersinnaanerlu qaffassarneqassasut, inuiattut naleqartitavut pingaartillugit ineriartortitsilluta. Nuna ataasiusoq – inuiaat ataatsimoortut tamanna isumaqatigiissutip saqqaani allassimavoq. Immikkoortoq taanna Naalakkersuisooqatigiit isumaqatigiissutaaniittoq Mette Lyngemit eqqarsaatigineqarsimanerluni, ilaqutariit inisseqqinneqarsimasut pillugit apeqqut sammigamiuk?, Jess G. Berthelsen aperivoq.
Illit qanoq isumaqarpit? Ataani oqallinnermi peqataagit.