Shellip sikunik aserorterutaa Oregonimut ippassaq tikittoq

Shellip Alaskap avannaani Tjukterhavimi uuliasiorluni qillerinissaminut atatillugu sikunik aserorterut Fennica atortussaavaa. Fennicali sapaatip-akunnerisa marlussuit matuma siorna Aleutini ikkarlippoq alillunilu.

Taamaattumik sikunik aserorterut 100 meterit sinnerlugit takissusilik USA-p kitaani naalagaaffimmi Oregonimi Portlandimi Swan Islandimut iluarsaatitikkiartorpoq. Umiarsuaq arfininngornermi ullaaralaakkut tikittoq, Associated Press paasissutissiivoq.

Sikunik aserorterut Shellip uuliaqarneranik misissueqqissaarneranut qitiulluinnartumik ilaavoq Shellillu Alaskap avannaata kitaani Tjukterhavimi qilleriffissami ilimaginngisamik pisoqariataassagaluarpat uuliamik mingutsitsisoqaratarsinnaaneranut atatillugu upalungaarsimaneranut ilaatinneqarluni. Fennica Shellip qillerivia sikunut illersortussaavaa atortorissaaruteqarlunilu uuliamik maqisoornermik unitsitsisinnaasunik.

Qajartortartut akerliussutsimillu takutitsisut allat 75-it missaanniittut arfininngornermi ualikkut Fennica inissisimaffigisaata eqqaaniipput.

– Issittumi avataasiorluni qillerinissanut eqqissisimasumik akerliussutsimik takutitsipput, akerliussutsimik takutitseqataasoq Mia Reback Associated Pressimut oqarpoq.

TV-eeqarfik KWG naapertorlugu tallimanngornerup arfininngornerullu akornanni unnuakkut Fennica tikimmalli kiisalu arfininngornermi ualikkut akerliussutsimik takutitsoqareerpoq.

Inuit ilaat aamma nunami siassimapput allgartarsualisaarlutik, ilaatigut ima allagartaqartunik, "Shell No, Save the Arctic."

KWG naapertorlugu arfininngornermi ualikkut akerliussutsimik takutitsisut 200-t missaanniittut umiarsuup eqqaatigut qajartorlutik angalaarput. Taakkua nassaarsiullaqqippalaartumik imminnut ima taasimapput: "kayaktivists."

The Coast Guard KWG naapertorlugu umiarsuup eqqaatigut isumannaallisaavimmik pilersitsivoq akerliussutsimik takutitsisut umiarsuullu 100 meterit sinnerlugit takissuseqartup akornanni ungasissuseqarnissaq qulakkeerniarlugu.

Akerliussutsimik takutitsinernut atatillugu tigusaasoqarsimanngitsoq, AP paasissutissiivoq.

Avatangiisinik illersuiniaqatigiiaat piumasarisimavaat Shellip Tjukterhavimi qillerinissamut qinnuteqaataa Obamap itigartitsissutigissagaa, sikunik aserorteruteqanngimmat.

Shellilli Tjukterhavimi misissuiffiusumik killilimmillu qillerisinnaalernera naalakkersuisunit sapaatip-akunnerata ingerlanerani siusinnerusukkut akuersissutigineqarpoq. Shell ikkattuinnarmut qillerinissamut akuerineqarpoq, suliffeqarfiup sumiiffimmi upalungaarsimanerata uuliamik aniasoortoqalersinnaanera unitsissinnaanavianngimmagu. Atortorissaarutit taakkua Fennicamiipput.

Akuersissummut tunngasoq maani atuaruk.

Isumannaallisaanermut atortut amigaataasut Associated Press naapertorlugu ilaatigut tassaapput assiaqutit 10 meterit missaannik portussusillit qillerivik ungaqqullugu kivisillugit inissinneqarsinnaasut uuliamillu aniasumik unitsitsisinnaasut imaluunniit umiarsuarmut slangit atorlugit toqqaannartumik atassusiisinnaasut.

Nunami namminermi pissutsinut ministereqarfik nalunaarpoq, Shell taamaallaat itinerusumut qillerisinnaalissasoq isumannaallisaat taaneqartoq ajutoortoqarneraniit akunnerit 24-t iluanni qillerivimmut ikkunneqarsinnaalerpat.

– Præsident Obamap innuttaasut piumasaat sapaatip-akunnerani matumani ilaginnarpaa, Shell Issittumi qillerinissamut piumasaqaatitalimmik akuersissuteqarfigigamiuk, Sierra Clubip Issittumik akerliussutsimik takutitsineranut pisortaq Dan Ritzman oqarpoq.

Avatangiisinik illersuiniaqatigiiffiit Issittup avinngarussimasumiinneranik pissutsillu peqqarniitsuunerannik imaani pinngortitami ataqatigiinneq qajannartoq aserorlugu uuliamik aniasoqalissagaluarpat saliinermut akornutaasinnaasunik ernummatiginnipput.

Issittumili qillerinissanik tapersersuisut oqarput, uuliasiorluni qillerinerit teknologii pioreersoq atorlugu isumannaatsumik ingerlanneqarsinnaasut, siunissamilu Issittumi uuliamik tunisassiorneq USA-p nukissamik pisaqartitaanik attassinissamut eqqussuinermillu isumalluuteqarnermik killiliinissamut tapertaasinnaaso.

Shellip oqaaseqartartua Kelly op de Weegh sapaatip-akunnerani siusinnerusukkut e-mail aqqutigalugu nalunaarpoq, Obamap qillerinissamut akuersissutaa akuersissutiginninnissamik suliap naammassineranut takussutissaasoq, qillerinerlu imaq sikuerpat aallartikkumaartoq. Shellip qilleriutai marluk Tjukterhavip tungaanut ingerlaarput.

US Geological Survey missingiivoq Tjukterhavimi Beauforthavimilu nappartanik 26 milliardinik uuliassamaateqartoqartoq, Associated Press paasissutissiivoq.