aatsitassat
Shell-ip issittumi uuliasiornissani unitsiinnaraa
Uuliasioqatigiiffik Shell Alaskami 2014-imi misileraalluni uuliasiornissani unitsiinnarpaa
Shell-ip Alaskami misileraalluni uuliasiornissani 2014-imi unitsippaa.
Uuliasioqatigiiffiup pisortaa Ben van Beurden oilvoice.com-imut nalunaaruteqarpoq.
2013-imi anorersuarnera pissutaalluni isumannaallinaanikkut ajutoortoqareersoq misileraalluni uuliasiorfigisaq Kullummik taaneqarsimasoq isumannaatsumik suliffineqarsinnaajunnaarpoq. Misileraalluni uuliasiornissaq ukioq manna ingerlanneqartussaagaluartoq unitsiinnarneqarpoq.
Kattuffiit 15-it Shell Alaskami misileraalluni uuliasiornissaa pillugu eqqartuussivilersuuppaat, sapaatip akunnera kingullerlu eqqartuussiviup kattuffiit tamarmik ajugaatippai. USA-p nunanut allanut ministereqarfiata Shell-imut misileraalluni uuliasiornissaanut akuersinera inatsisitigut eqqunngitsumik iliortoqarsimasoq eqqartuussivik tunngaviliilluni. Msileraalluni uuliasiornissat avatangiisinut qanoq sunniuteqarsinnaanerat amigartumik suliarineqarsimavoq.
Shell-ip pisortaata eqqartuussiviup aalajangiinera pakatsissutigaa, Alaskamilu siunissami misileraalluni uuliasiornissaq anguneqarsinnaanngitsoq paasillugu.
Misileraalluni uuliasiornissap unitsiinnarneqarnera Greenpeacemiit nuannaarutigineqarpoq.
- Shell-ip mianersoqqussutit soqutiginngitsuusaaginnarnikuuaat, tassami issittumi uuliasiorniarneq ilungersunartuuvoq, ajutoortoqassagaluarpallu eqqugaasussat amerlasuujusussaallutik. Misileraalluni uuliasiortoqarmat uuliasiorfik tingitaangajavippoq. Issittumi misileraalluni uuliasiorneq isumatusaarnerunngivippoq, taamaattumillu Shell-ip misileraalluni uuliasiornissani unitsiinnarmagu ajunnginneruvoq, Jon Burgwald tusagassiutinut nalunaarummini oqarpoq.