Shell-imut akerliuniarnermi kingorna Greenpeace akiliisinneqarsinnaavoq

Greenpeace Fredericiami akerliuniarnermi kingorna akiliisinneqarsinnaavoq. Shell-ip politiit qinnuigai avatangiisinut illersuiniaqatigiiffik unnerluutigeqqullugu, akerliuniat Fredericiami pujoorfimmut majuarnerisa kingorna.
Aggustimi akerliuniat arlalissuit Fredericami taamaasiornerisa kingorna politiit akiliisitsinissaq isumaliutigaat.
Greenpeacemit akerliuniat 30-t sinnillit akiligassinneqareersimapput, tassa Shell-ip akuiaavianut isersimammata selskabip Issittumi ingerlatsineranut akerliuniarlutik.
Maannali avatangiisinik illersuiniaqatigiiffik akiligassiissummik pillarneqaratarsinnaavoq.
– Greenpeacep unnerluunneqarnissaanik piumasaqaammik pisimavugut, Sydøstjyllands Politi-ni eqqartuussissuserisut pisortaat Rune Jensen Ritzau-mut oqarpoq.
Atuaruk: "Nannut akerliuniat Danmarkimi Shell akerliuniarfigaat"
Politiit taamaallaat unnerluussisinnaapput ajortuliorfigineqartoq tamatuminnga qinnuteqarpat, maannalu tassa taamaasiortoqarpoq.
Inatsisinik unioqqutitsinermi pineqarpoq illumi eqqissiviilliortitsitsinermik taaneqartartoq.
Greenpeace akiligassinneqassanersoq aalajangerneqassaaq politiit paasiniaanertik naammassippassuk. Rune Jensenip naatsorsuutigaa tamanna sapaatit akunnerinik marlunnik-pingasunik sivisussuseqassasoq.
Aggustip 28-anni akerliuniarnermi akerliuniarpaaluit akunnerni arlalinni pujoorfimmut portusuumut silo-mullu qaqisimapput, allagartarsuarlu 23 meterinik angissusilik allagartalik "Save the Arctic" nivinngarlugu.
Tamatuma saniatigut Shell-ip ilisarnaataa tiaavulutut nassulerpaat, Greenepeacellu akerliuniarneq iluatsilluartutut taavaa.
Illersuiniaqatigiiffik akiliisinneqassappat tamanna siullermiussanngilaq. 2006-imi akiligassiissut Østre Landsret-ip 50.000 koruuninut qaffappaa, illersuiniaqatigiiffiup nersutit nerisassaanni soja-mut naagasuartitamut akerliuniarnerata kingorna.
Taamanikkut akerliuniat nunalerisut kattuffiata qullersaqarfianut Axelborgimut qaqipput illulu allagartarsualerlugu oqaasertalimmik "Nej til gmo-svin".