Sermitsiaq.AG-mut angusat aamma naammaginanngitsut

- 2014-imi angusat Sermitsiaq.AG-mut naammagisassaanngillat.

Tusagassiivik Sermitsiaq.AG nalunaaruteqarpoq.

Sermitsiaq.AG 2014-imi akileraarutit ilanngaatigereerlugit 250.000 koruuninik sinneqartooruteqarpoq, taakkualu siorna naatsorsuutitigut angusanut 3.651.000 koruuninut sanilliullugit ajorseriarnerupput.

- Angusat ulluinnarni aqutsisunit siulersuisunillu naammaginanngitsutut isumaqarfigineqarput. Angusanit takutinneqarpoq, Kalaallit Nunaanni tusagassiorfimmik kiffaanngissuseqartumik arlaannaannulluunniillu attuumassuteqarfimmik ingerlatsiniarnerup ajornakusoornerujussuanngorsimanera.

- Angusat inuiaqatigiinni aningaasarliornermit annertuumik sunnersimaneqarput, tamatumannga ussassaarutinik nioqquteqarneq sunniivigineqarsimammat. Angusanut pissutaaqataasut aamma tassaapput unammilleqatigiinnerup annerulersimanerata kinguneranik aviisit aaqqissuisoqarnikkut imarisanut suli aningaasaliissuteqarnerat, kiisalu aviisit misissuerpalaartumik tusagassioriaatsimut Kalaallit Nunaanni tamat oqartussaaqataanerannut pingaaruteqartumut aningaasaliissuteqarnerat. Aningaasaqarneq tatineqaraluartoq nunami maani najukkami Issittumilu nunat tamalaat akornanni tusagassiornerup ineriartortinneqarneranik ingerlatiinnassavarput, Sermitsiaq.AG taama tusagassiuutinut nalunaaruteqarpoq.

Namminersorlutik Oqartussanit taperneqartarunnaarneq
Sermitsiaq.AG-mit 2014-imi angusat ajorseriarnerannut pingaarutilimmik pissutaasoq tassaanerarneqarpoq, Namminersorlutik Oqartussat aviisinut nuna tamakkerlugu saqqummersartunut tapiissutinik ilimaginngilluinnakkamik atorunnaarsitsisimanerat.

- Naak tapiissutit 2014-imut aningaasanut inatsimmi akuersissutigineqarsimasumi allassimagaluartut. Sermitsiaq.AG-p iliuuserineqartoq tamanna siunniussanut inatsisillu oqaasertaanut naapertuutinngitsutut, taamaalillunilu politikkikkut amerlanerussuteqartunut, tapiissutinik akuersissutiginissimasunut, aamma naapertuutinngitsutut isumaqarfigaa, tusagassiivik taama allappoq.

Sermitsiaq.AG-p 2014-imi ilanngaatissat suli ilanngaatiginagit isertitai 18.723.000 koruuniupput, 2013-imi 19.835.000 koruunisut. Nammineq aningaasaatit 15.062.000 koruuniupput, ukiup ataatsip matuma siorna 14.812.000 koruuniusut.

Atuaruk: Sermitsiaq.AG-mut 2013-mi angusat naammaginanngitsut

Nittartakkami rekordi nutaaq
Nittartagaq nutaarsiassanik saqqummiussiviusartoq www.sermitsiaq.AG Kalaallit Nunaanni suli alakkarneqarneqarpaasarpoq, alakkaasartullu kisitsisinngorlugit suli amerliartortuarlutik. Alakkaasut immikkuullarissut siullermeerutaasumik 2,1 millioner sinnerlugit amerlassuseqalerput. 2013-imut sanilliullugu qaffariaat 5,9 procentiulluni.

2014-imi quppernernik takutitsinerit 28,8 millioninik amerlassuseqarput – 2013-imut sanilliullugu qaffariaat 2,7 procentiulluni.

Nittartagaq nunatsinni sulisussarsiortarfiit atorneqarnerpaartaannik aamma imaqarpoq, Sermitsiaq.AG/JOB.

Nittartakkami ussassaarineq ussassaarutinillu takutitsisarneq ukiup siulianut sanilliullugu aamma qaffakkiartuaarsimavoq.

Aviisini kaaviiaartitat ikiliartortut
Aviinik naqitanik tunisaqarnermit kaaviiaartitat 2014-imi 7.804.000 koruuninik amerlassuseqarput, 2013-imi 8.111.000 koruuninik amerlassuseqarsimasut. Aviisit naqitat marluk naqinneqarnerminni amerlassuserisartagaat nunat killiit sinnerinisut 2013-imut sanilliullugu aamma appariartorsimavoq. Akerlianik aviisit nittartakkakkt tunineqartut amerlassusaat qaffakkiartortut, tusagassiivik paasissutissiivoq.

Aningaasarliorneq 2014-imi aviisit ussassaarutitigut kaaviiaartitaannut aamma sunniuteqarsimavoq, sulisussarsiorluni ussassaarutit suli appasissumiimmata. Ussassaarutitigulli kaaviiaartitat tamarmiusut ukiup siulianut sanilliullugit 667.000 koruuninik amerleriarsimapput.

Ajornartorsiortoqaraluartoq nutaanik ineriartitsisoqarpoq: Nittartagaq, www.sermitsiaq.ag/tuniniaavik, inuinnaat nioqqutissaatiminnik aamma tunisaqarfigisinnaasaat, nutaamik ilusilersorneqarpoq, tassunga ilanngullugu www.Sermitsiaq.ag-p saqqaani ussassaarummik takutitsisinnaanermut periarfissaq.

Nittartagaq Sermitsiaq.AG JOB nutaamik ilusilersorneqarpoq pitsaanerusumik atorneqarsinnaanngorluni, ilaatigut atorfinnik inuttassarsiuussanik immikkoortiterinissamut ujaasinissamullu periarfissamik. Immikkoortiterisinnaaneq aqqutigalugu ujaasineq pitsaanerulersinneqarpoq tamatumalu peqatigisaanik sulisussarsiortartunut naleqqussaanissamut tunngavissatut atuulluni.

Nuuk Lokalreklame A/S, Nuuk Ugeavisimik saqqumersitsisartoq, pingaartumik inuiaqatigiit aningaasaqarneranni pitsaanngitsumik ineriartorneq tunngavigalugu annertuumik kinguariaateqarsimavoq.

Nuuk Lokalereklamemi ilanngaatissat akileraarutit peereerlugit angusat tassaapput 135.000 koruuninik amigartoorutit, 2013-imi 605.000 koruuninik sinneqartooruteqarsimagaluarluni.