tusagassiuutit
Sermitsiaq.AG-mut 2013-mi angusat naammaginanngitsut
Sermitsiaq.AG 2013-imi akileraarutit ilanngaatigereerlugit 3.300.000 krouuninik sinneqartoorpoq, ukiup siuliani angusanut sanilliullugu ajornerusumik
- 2013-imi angusat Sermitsiaq.AG-mut naammagisassaanngillat.
Tusagassiivik Sermitsiaq.AG nalunaaruteqarpoq.
Sermitsiaq.AG 2013-imi akileraarutit ilanngaatigereerlugit 3.300.000 koruuninik sinneqartoorpoq, ukiup siuliani angusanut sanilliullugu ajornerusumik.
- Angusat Kalaallit Nunaanni naqisimaneqanngitsumik attuumassuteqanngitsumillu tusagassiuuteqarnerup qulakkeerneqarnissaata ajornakusoornerulersimaneranik takutitsisut ulluinnarni aqutsisunit siulersuisunillu naammagineqanngillat, tusagassiutinut nalunaarummi oqaatigineqarpoq.
Sermitsiaq.AG-p 2013-imi ilanngaatissat suli ilanngaatiginagit iluanaarutai 19.485.000 koruuniupput, 2012-imi 21.417.000 koruuniusimallutik, tamannalu nammineq aningaasaatit 13.988.000 koruuninik, ukiup ataatsip matuma siorna 10.689.000 koruuninut amerlassuseqalernerannik kinguneqarpoq.
Nittartagaq siuariariartuinnavippoq
Nutaarsiassanik nittartagaq www.sermitsiaq.AG Kalaallit Nunaanni alakkarneqarnerpaasarpoq, alakkaasullu amerlassusaat suli qaffakkiartorluni. Alakkaasut 2012-imut sanilliullugu 84 procentit sinnerlugit amerleriarsimapput.
Nittartagaq aamma nunatsinni atorfinnik inuttassarsiuussisarfiit alakkarneqarnerpaartaannik Sermitsiaq.AG/JOB-imik imaqarpoq.
Kaaviiaartitat ikiliartortut
- Aviisinik tunisaqarnikkut kaaviiaartitat 2013-imi 7.760.000 koruuniupput, 2012-imi 8.964.000 koruuniullutik. Aviisit naqitat taakkua marluk naqitanngorlugit amerlassusaat nunat killiit sinnerinisut 2012-imut sanilliullugit appariarsimapput. Tamatuma akerlianik aviisit nittartakkakkut tunineqartartut amerliartorput.
Aningaasaqarnikkut ajornartorsiorneq 2013-imi aviisit ussassaarutitigut kaaviiaartitaannut aamma malunnaateqarsimavoq, atorfinnik inuttassarsiuussinerit suli appasissumiimmata. Ussassaarutitigut kaaviiaartitat tamarmiusut ukiup siulianut sanilliullugit 1.116.000 koruuninik ikileriarsimapput.
Ajornartorsiortoqaraluartoq saqqummersinneqartartut nutaat ineriartortinneqarsimapput: Arctic Journal. Tamatuma saniatigut Kommune Kujallermi najukkami aviisimik nutaamik aallartitsisoqarpoq.
Nuuk Lokalreklame A/S, Nuuk Ugeavisimik saqqummersitsisartoq, annikitsuinnarmik siuariaarteqarsimavoq, Tusagassiivik Sermitsiaq.AG nalunaaruteqarpoq.