qinersineq
Sermitsiaq.AG-mi pisortaq: Siammasissumik suleqatigiittoqarnissaanik
Ajornartorsiornermit aniguisoqassappat partiit anginersaajusut suleqatigiittariaqarput, Poul Krarup oqarpoq
Kalaallit Nunaanni qaammatini kingullerni politikkikkut aningaasaqarnikkullu ilungersunartorsiorpoq. Tamanna innuttaasut Inatsisartunut qinersinermikkut politikkikkut ingerlaneq allanngortissinnaavaat.
Politikkikkut isumaqatigiinngissutit qaangerlugit siammasinnerusumik Inatsisartuni suleqatigiittoqalernissaa qinersinermi periarfissiisoqarpoq.
Tusagassiivimmi Sermitsiaq.AG-mi pisortaq Sermitsiamilu pisortaaneq Poul Krarup naliliivoq.
- Politikkikkut partiit avissaartuunnerat atorfissaqartinneqanngilaq. Siunissaq eqqarsaatigalugu siammasissumik aaqqissuusseqqittoqartariaqarpoq, tassani partiit anginersaasut marluk suleqatigiittariaqalerput. Ineriartorneq pitsaanerusumut musisinneqartariaqarpoq. Partiit isumaqatigiiffiginngisaminnik naaperiaasariaqalerput, Poul Krarup Ritzauimut oqarpoq.
TV-kkut qineqqusaarneq kingulleq sisamanngornermi ingerlanneqarpoq. Aningaasaqarnerup ingerlanerlunnera pillugu partii Siumut isornartorsiorneqangaatsiarpoq.
Aningaasaqarnerup inissisimanera qanoq isikkoqarnersoq qinersisoqareernerata kingornaa aatsaat partiimit saqqummiunneqarnissaa anguniarneqaraluarpoq. 275 million koruunit sinnerlugit amigartooruteqarnissarli pillugu pingasunngornermi saqqummiussisoqarpoq.
- Aningaasaqarnerup inissisimanera qinersinermut sunniuteqarnerpaasussaannguatsiarpoq, Poul Krarup oqarpoq.
Aalisarnermut aamma siunissami suliffissuit pillugit Inuit Ataqatigiit aamma Siumut isumaqatigiinngissuteqarput.
- Assigiinngitsunili naaperiaasinnaapput. Sanaartornermi, aalisarnermi takornarialerinermilu kikkut suliffissaqartitsisinnaanerat apeqqutaalluinnarpoq, Poul Krarup oqarpoq.
IA-p siulittaasua Sara Olsvig Siumumilu siulittaasoq Kim Kielsen inuttut assigiinngissuseqarnerupput, politikkimi assigiissuseqarnerullutik, tamanna nikingassutaanni annersaavoq.
- Sara Olsvig ilinniaqqortuujuvoq, Kim Kielsen aalisarnermi piniarnermilu misilittagaqarnerulluni. Soqutigisaqarfimminni tatiginartuupput, Poul Krarup oqarpoq.
Naalakkersuisut siulittaasorisimasaat Aleqa Hammond nunatta karsianit atornerluisimanera pissutaalluni Inatsisartunut qinersinissamik suaaruteqartoqarpoq oktobarip aallaqqaataani.