qinersineq
Sermitsiaq.AG-mi pisortaq: Kalaallit Nunaanni nalinginnaanngitsumik politikkikkut aalassassimaartoqarpoq
Kalaallit Nunaanni politikkikkut pisut amerlaqaat ulluni kingullerni - Inatsisartunut qinersisoqassaaq novembarip naanerani
Naalakkersuisut tunuartut, Aleqa Hammond Siumumi siulittaasutut tunuartoq, Atassutip Naalakkersuisooqateqarnini unitsikkaa kiisalu Inatsisartunut qinersisoqarnissaanik suaaruteqarneq.
Kalaallit Nunaanni politikkikkut ingerlatsineq ullup ataatsip ingerlanerani muminneqartutullusooq ippoq. Kalaallit Nunaanni nalinginnaanngitsumik politikkikkut aalassassimaartoqartoq Tusagassiivik Sermitsiaq.AG-ip pisortaa Poul Krarup naliliivoq.
- Politikkikkut annertuumik aalassassimaartoqarpoq. Pisoq nalinginnaanngitsuuvoq aamma aatsaat taama pisoqarpoq. Uanga assingusumik misigisaqarnikuunngilanga, Poul Krarup Ritzauimut oqarpoq.
Naalakkersuisut siulittaasorigallagaata Kim Kielsenip Siumumeersup Inatsisartunut qinersisoqassasoq novembarip 28-ani nalunaarutigaa. Naalakkersuisut amerlanerussuteqarunnaaramik qinersisoqarnissaanik suaaruteqarput. Naalakkersuisooqataasimasut Atassut tatiginnikkunnaarlutik tunuarput.
Naalakkersuisut siulittaasorisimasaat Aleqa Hammond Atassutip tatigiunnaarmagu Naalakkersuisooqatigiinnit tunuarput. Aleqa Hammondip nunatta karsianit 106.363,27 koruuninik atornerluisimanera pillugu tallimanngormat nalunaaruteqartoqarpoq.
Qinersisoqarnissaanik suaaruteqartoqarnera pissutaalluni Inatsisartuni sulineq unitsinneqarallarpoq.
- Partiit tamarmik qinersinissamut piareersalerput. Politikkikkut sulineq unitsinneqarallarpoq. Tamanna naliginnaanngitsuunngilaq, kisianni qinersinussamik suaaruteqartoqarnissaata tungaanut pisut nalinginnaanngitsuupput, Poul Krarup oqarpoq.
Pingasunngornermili allanik pisoqariasaarpoq. Naalakkersuisut sisamat tunuarlutik nalunaaruteqarput, Atassutip aamma Siumumik Naalakkersuisooqateqarnini unitsippaa.
Aleqa Hammond aamma Siumumit pingasunngornerup ingerlanerani siulittaasutut tunuarpoq. Sivitsunngitsoq Inatsisartunut qinersisoqarnissaa suaarutigineqarpoq.
Aleqa Hammond 2013-mi Naalakkersuisunut siulittaasuulerpoq. Kalaallit Nunaanni politikkimut iseqqinnissaa maannakkut nalornissutigineqarpoq.