NunaMinerals
Sermitsiaq: Naqqitassaqanngilagut
Aviisip kukkusumik issuaasimaneragaanini ilumuunnginnerarpaa
Namminersorlutik Oqartussat nittartakkaminni Nunaminerals pillugu Sermitsiami normu 17-imi allaaserisanut marlunnut takisuumik allaaserisaqarluni naqqiissuteqarpoq.
Tamatumunnga atatillugu aviisip ilumuunnginnerarpaa Siulittaasup Naalakkersuisoqarfiani pisortaagallartoq Søren Hald Møller kukkusumik issuarsimallugu, imaluunniit paasissutissanik eqqunngitsunik uppernarsaatissaqanngitsunilluunniit saqqummiussisimalluni.
Allaaserisani marlunni atuarneqarsinnaasutut Søren Hald Møller pisimasunut atatillugu apersorneqarusussimanngilaq.
Mail-ikkut apeqqutinik arlalinnik nassinneqarsimavoq, tamakkualu naatsumik akissuteqarfigai. Tamatuma saniatigut Sermitsiami sulisoq naalakkersuisoqarfiullu pisortaa akunneq ataaseq minutsillu 15-it telefonikkut oqaloqatigiissimapput. Oqaloqatigiinnerli tamanna atuartartunut ilaqutaanngilaq, tassa isumaqatigiinngissutigineqarmat Søren Hald Møller qanoq issuarneqassanersoq. Allatut oqaatigalugu: Apeqqutinik piviusunik arlalinnik pivoq, akissutissaalli arlallit amigaatigaavut.
Oqaloqatigiinnerup inerneraa Søren Hald Møller oqarfigineqarmat allakkatigut akissutit, taamanikkut tunniutereersimasai, naammagiinnartariaqarivut.
Allaaserisami »Nunamineralsip suleqataa: Kalaallit Nunaata uppernassutsini annaavaa«, allassimavoq isorinnissutut, sydkoreami ingerlatsiviup Kores-ip Namminersorlutik Oqartussanut nassiussimasai, tamaasa naalakkersuisoqarfimmi pisortap piviusumik isummefigisimanngikkai. Suli taamatut isumaqarpugut.
Eqqorpoq Søren Hald Møllerip - naqqiummi allassimasutut - Namminersorlutik Oqartussat allakkat Kores-imut akissutaat Sermitsiamut mail-ikkut nassiussimammagit.
Allakkalli, ilaatigut isorisanut tamanut isummersimanngimmata, ilaatigullu apeqqutinik nutaanik arlalinnik saqqummiussiinnarlutik, isornaatsumik issuaraluarutsigit atuartartut paasisaqarfigingaarnavianngilaat. Allatut oqaatigalugu, suli Søren Hald Møllerimik apersuineq isumalluutigaarput, taannali apersorneqarumanngilaq.
Tamatuma saniatigut allaaserisami »Piffissaq kingulleq atorlugu akiligassat akilernissaannik neqeroorfigitittoq«-mi paasissutissat aalajangiusimavagut.
Tassani pineqarpoq tuluit aningaasaliissuteqarnermik ingerlatsiviat Worthington PLC Namminersorlutik Oqartussanut neqerooruteqarsimasoq, tassa ingerlatsiviup 4,5 millioner koruunit, Nunamineralsip Namminersorlutik Oqartussanut akiitsui, akilerumasimammagit. Søren Hald Møllerilli neqeroorut qisuariarfigisimanngilaa, taamaallaat mail-ip tigusimanera uppernarsarlugu. Tassa tuluit aningaasaliisut ikiuiniarsimanerat kingulleq. Ullut marluk qaangiuttut Nunamineralsip siulersuisui nalunaarput ingerlatsivik akiliisinnaajunnaartoq.
Aælaaserisami allappugut Søren Hald Møllerip piaimasup ingerlarnganik saqqummiussinera illuatungeriit mail-ikkut allaqatigiittarsimanerannut, Sermitsiap pissarsiarisimasaanut, naapertuutinngitsoq.
Sermitsiap Nunaminerals qaammatini arlalinni qanimut malinnaaffigisimavaa. Aviisit tamarmik Sermitsiaq.AG-miipput.
Tassani Sermitsiaq nr. 17, apriilip 24-anni saqqummersoq, pisiarisinnaava allaaserisallu namminersorlutik oqartussat naqqiissuteqarfigeqqusai atuarlugit.