Sermip ataani mingutsitsisoqarnersoq Danmark misissuivoq

Danskit naalakkersuisui maanna Camp Centurymi atortut qimaannakkat avatangiisinut sunniutaannik naliliinermik aallartitsinissamut kiisami akuersipput. Naalakkersuisut tusagassiuutinut nalunaarutaanni tamanna atuarneqarsinnaavoq.

Naalakkersuisut 2014-imili Danmark qinnuigaat Camp Centurymi sermip ataani 1960-ikkut aallartinnerani sananeqartumi avatangiisinik mingutsitsineq misissoqqullugu.

Atuaruk: Ilisimatuut: Eqqagassaq ulorianartumik qinngornilik akuerineqarsimavoq

Sakkutooqarfikoq sermimit saqqummissasoq
Misissuinerup Geopysical Research Lettersimi saqqummiunneqartup silap pissusiata allanngoriartornerani ukiuni 100-ni tulliuttuni toqunartut sermimit saqqummertittussaaneranik takutitsimmat, suliaq nutaamik oqallisaaleqqippoq.

- Kiisami Danmark Camp Century-mi mingutsitsinermik misissuilluni aallartittussanngornera nuannaarutigaarput, kisiannili Camp Century-p eqqaani avatangiisinik peqqissutsimullu mingutsitsinerit ulorianartorsiortitsisinnaanerillu, tassungalu radioaktivitetinut tunngasut ilanngullugit tamakkiisumik paasiniaasoqarnissaa Naalakkersuisut suli piumasarigaat ersarippoq, avatangiisinut pinngortitamullu naalakkersuisoq Suka K. Frederiksen (S) naqissusiivoq.

Atuaruk: Professori: Imeq radioaktiviusoq sermersuarmiittoq ajoqusiinngilaq

PCB ernummatigineqartoq
Misissuinerup Geophysical Research Lettersimeersup tikkuarpaa, imeq maangaannartitaq radioaktiviusoq aamma toqunartoq PCB, sakkutooqarfiusimasoq sermimit saqqummerpat avatangiisinut kuussinnaasoq.

Ilisimatuup misissuisup radioaktiviunera annikinnerarlugu nalilerpaa. Taamaattorli PCB uumasut inuillu naartuinik ajoqusiisinnaammat ernummatigineqarneruvoq.

Naalakkersuisullu naapertorlugu danskit naalakkersuisuisa aamma iluarsaassinissamut akisussaaffik inissinnissaanut periarfissat misissornialerpaat. Tamannarpiarlu Danmarkip Nunattalu akornanni assortuussutaanikuuvoq.

Atuaruk: Misissuineq nutaaq: Sakkutooqarfik atomreaktorilik sermimit saqqummissaaq

Iluarsaassinissamut isumaqatigiissuteqanngitsoq
Tassami sakkutooqarfiusimasup iluarsaanneqarnissaanut isumaqatigiissuteqanngilaq. Taamaammat Amerikamiut illersornissaqarfiat iluarsaassinissamut akisussaatitaasinnaanersoq nalunarpoq.

- Mingutsitsinermut akisussaasuusut saliinissaat Naalakkersuisunit suli piumasarineqarpoq, pinngortitamut avatangiisinullu naalakkersuisoq Suka K. Frederiksen naqissusiivoq.