aserorterisoqareersoq
Sermimit illuigaq piilerpaat
Nuup qeqqani sermermik illuikkiorluni suliarujussuaq pakatsinartumik naggaserneqarpoq
Illuigaq qalipaatigeqqisoq Nuup illoqarfiata qeqqaniittoq peerneqalerpoq sapaatip akunnerata naanerani serlersaarfigineqareerluni. Meeqqat inuusuttuaqqallu immuit puukui 800-ut atorlugit sermilioreerlutik sapaatit akunneri sisamat illuikkiorput.
Sermermit illuikkiaq ilumigut qaammaqquserneqarluni qalipaatigilluni alutornarluinnaraluarpoq. Serlersaarisulli kikkuuneri paasineqanngitsut unnuit tulleriit serlersaarinerisa kingora illuikkap ilarujussua aserorsimavoq.
Misilittakkat pitsaasut
- Ataasinngornermi illuigaq misissoreerlugu aalajangerpugut peerluaannarniarlugu. Qarmai sermiupput manngertorujussuit maanna aserorneqarsimasut. Isumaqarpugut ulorianartorujussuusoq qarmakut ilaatigut inngivissut milluutigineqalissappata, illuikkiornermi ataqatigiissaarisoq Aviaq Tobiassen, Nuummi inuusuttut siuarsartuniit, NUIFimiit Sermitsiaq.AG-mut taama oqarpoq.
Suliniummi peqataasut immuit puukui 800-ut katersorsimavaat imermik qalipaasikkamik immersimavaat. Illuigaq sivisuumik suliarineqarpoq imermik qarmasissiat piareermata. Suliarujussuarli piareerneqarnerminniit ulloq ataasiinnaq napareerluni kikkuuneri ilisimaneqanngitsunit serlersaarfigineqarpoq.
- Suliaq ingerlasimanera pakatsiffiinnartut isiginngilarput. Maanna paasivarput sermimik illuikkiorneq qanoq suliassaanersoq. Soorunami aamma pakatsissutigaarput suliarujussuaq allanut sivisunerusumik nuannaarutaasinnaanngimmat, Aviat Tobiassen oqarpoq.