kajussaasiineq
Sermiligaami Taunâjik kajumissaaserneqarpoq
Mattaani Taunâjik Sermiligaameersoq, imigassartortoqannginnissaanik suliniuteqartarnera pissutigalugu Kommuneqarfik Sermersuumit kajumissaaserneqarpoq
Kommuneqarfik Sermersuumi borgmesteri Asii Chemnitz Narup Tunumi nunaqarfimmi Sermiligaamiippoq ulluni makkunani. Tassunga atatillugu Mattaani Taunâjimmut kajumissaammik tunivaa.
Nunaqarfimmi imigassartortoqannginnissaa anguniarlugu suliniuteqartarnera kiisalu nunaqarfimmi innuttaasut ataqatigiinnerunissaat anguniarlugu suliniuteqartarnera pissutaalluni kajumissaaserneqarpoq. Nunaqarfimmi aamma Sanningasoq Tungujortoq pilerseqqinnikuuaa.
- Kajumissaaserneqarnera nuannaarutigeqaara, Mattaani Taunâjik Sermitsiaq.AG-mut oqarpoq.
Inuusuttut aamma nunaqarfimmi isiginnaartitsinerannut suliniuteqartuuvoq.
Kajumissaammik tunniussinerminut Asii Chemnitz Narup oqaaseqarpoq:
- Inuit najukkaminni akisussaaffimmik tiguserusuttut, inuiaqatigiinni ajornartorsiutinik annertoorsuarnik eqqartueqateqarnissaminnut sapiissuseqartut pisariaqartippavut. Taamaattumik Mattaani Taunâjik kajumissaammik tunnisinnaagakku nuannaarutigaara, borgmesteri tusagassiutinut nalunaarummi oqarpoq.
Mattaani Taunâjik suliumatuutut oqaatigineqarpoq, innuttaasunik allanik sunngiffimmi nammineq kajumissuseq tunngavigalugu sulinissaannik kaammattuisartutut, aammalu inuunermi unammilligassat pillugit nammineq inuttut isummaminik ersersitsiniaruni tunuarsimaartuunngitsoq.
Kommuneqarfik Sermersuumi kajumissaaserneqartut marluupput ukioq manna. Kajumissaasigassap aappaa Nuummi aaqqissuussisoqarnerani tamanut nalunaarutigineqarumaarpoq.