Ilinniarneq
Sermersuup nutaamik pisortartaarnikkut atuarneq ukkatarinerulerpaa
Illoqarfiit pingaarnersaata kommuniani politikkikkut amerlanerussuteqartut meeqqanut tunngasunik pitsanngorsaallutik allaffissorneq avinniarpaat, atuarfeqarneq aamma inunnik isumaginninnermut tunngasut immikkoortunngussallutik. Ukiunut sisamanut tulliuttunut IA-p, Demokraatit aamma Atassutip isumaqatigiissutigisaani tamanna atuarneqarsinnaavoq.
Ineriartorneq mumisinniarlugu, inuusuttut Sermersuumiittut atuarnermik naammassinninnissamik piginnaanngorniassammata, illoqarfiit pingaarnersaata kommuniani politikkikkut amerlanerussuteqartut annertuumik allannguiniarput - minnerunngitsumik allaffissornerup tungaatigut.
Pingaartillugu iliuuseqarneq
Politikerit ilaatigut sukangasuumik piumasaralugu inuusuttut ukioqatigiiaat 95 procentii ukiualunnguit qaangiunneranni ilinniagaqalersimanissaat politikerit anguniarniarnerannik allannguineq pissuteqarpoq, tamanna kommunimut qinersinerup kingorna pingajussaanik borgmesterinngortup Asii Chemnitz Narupip tusagassiuutinut nalunaarummi nassiussaani atuarneqarsinnaavoq.
- Aamma meeqqanut tunngasut ingerlatsinikkut immikkoortissavagut. Pissutigalugu isumaginninnermi suliat aamma inooqatigiissutsikkut ajornartorsiutit ilinniarneq sunnernerliortarmassuk, taamaammat siunissami meeqqanut tunngasut avissaartissavagut, meeqqanut atuarfeqarnermullu pisortaqalerluta – imaappoq nalinginnaasumik sulianut tunngasunut. Aamma meeqqanut ilaqutariinnullu tunngasunut pisortaqalissaagut, inunnik isumaginninnermut akisussaasussamik. Isumaqarpugut taamaaliornikkut suliniutit ajornartorsiutit pilersarfiini pitsaanerpaamik nukittorsarsinnaallugit, borgmesteri Asii Chemnitz Narup taama ilisimatitsivoq.
Kommunip ukiuni sisamani tulliuttuni politikkikkut anguniagassai, partiit taakku pingasut isumaqatigiissutigisaat nalunaaqutaq 11.00 saqqummiunneqassapput.
Suliutissarpassuit
- Suliniutissatut takorloorneqartut allattorsimaffiat takeqaaq, kisianni aamma annertuumik pingaartissavagut ilinniartitsisussarsiorneq ilinniartitsisoqatigiinnilu suli annertunerusumik piginnaanngorsaaneq. Tamanna atuartunut ilikkagassatigullu ineriartornissaannut pingaartuuvoq, ilinniartitsisut akornanni sulianut tunngasutigut suleqatigiittullu avatangiisinut pingaartuuvoq, meeqqallu amerliartortillugit suliniutit maanna aallartinnissaat eqqortuuvoq, ajornartorsiutinik artukkinneqannginnitsinni, kommuninut qinersinermi taaguulluarneqarnerpaaq, Asii Chemnitz Narup taama allappoq.