aningaasaliinerit sipaarniutillu
Sermersuup missingersuutit akerliusoqarani akuerai
Siunissap qularnartup illoqarfiit pingaarnersaanni kommuunip aappaagumut missingersuutit sunniuteqarfigai
Kommuneqarfik Sermersuumi kommunalbestyrelsip aappaagumut missingersuutip siunnersuutigineqartoq marlunngornermi unnukkut akerliusoqarani akueraa.
Tassani 27 millioninik sinneqartoortoqarnissaa naatsorsuutigineqarpoq aammalu sanaartortitsinissamut 232 millionit koruuninik aningaasaliisoqassasoq.
Ivigaasanik arsaattarfiit nutaat arlallit sanaartortitsinissamut aningaasaliissutit ilagaat.
Atuaruk: Sermersooq ivigaasanik arsaattarfinnik pilersitsilerpoq
Aappaagu aamma sipaarniassasut
Kommuunip akileraarnermut procenti allanngortinnianngilaa, aningaasaliissutinullu akissaqarniarluni teknikkimut aamma isumaginninnermut ingerlatsivinni sipaarniuteqassassaaq.
Naak Sermersooq rubinisiorfimmut Qeqertarsuatsiaamut inuiaqatigiinnut isertitaqarnerusussamik neriuuteqalersitsisumut kommuuniugaluarluni, kommunalbestyrelsip tassanngaanniit imaluunniit aatsitassarsiornikkut allatigut annertuumik isertitaqarnissani naatsorsuutigisimanngilaa.
Ukiuni aggersuni kommuunip akileraartarnermut tunngavianit annertuumik qaffariartortoqarnissaa naatsorsuutigineqanngilaq.
Akitsuutit aamma akileraarutit qaffasinnerulissasut
Aalisarneq aamma takornariartitsinermit inuussutissarsiutini suli annnertunerpaamik isertitsissutaassapput.
- Isertitat taamaallaat akileraarutitigut aamma akitsuutitigut annertusineqarsinnaapput, missingersuummi taama oqaasertaliisoqarpoq.
Kommuneqarfik Sermersooq aappaagu ukioq mannamut sanilliullugu akileraarutitigut isertitaqarnerussalluni naatsorsuuteqarpoq.
Aningaasartuutitigut tatineqarneq aamma annertusiartorpoq. Minnerunngitsumillu meeqqanut ikiortarialinnut ikiorsiissuteqartarnermut suliassaqarfimmut aningaasartuutit qaffakkiartupiloorput.
Kommuneqarfik Sermersooq pillugu allaaserisat tamaasa uani atuakkit