periarfissat amerlanerit
Sermersuup inuusuttunut innarluutilinnut iliuuseqarneq nukittorsarpaat
Inuusuttunut annertuumik innarluutilinnut neqeroorummik Nuummi pilersitsisoqassaaq
Kommunalbestyrelsimit isumaqatigiissutigineqarpoq ornittagaq Kammagiit nukittorsaavigineqassasoq aamma inuusuttunut innarluutilinnut suliniarneq.
Ornittagaq Kammagiit aalajangiineq nutaaq aallaavigalugu tassaalissaaq inuusuttunut neqeroorut.
- Angajoqqaat suleqatigiiffiisa innarluutilinnullu suliniaqatigiiffiit oqariartuutaat naalaarniarsimavagut, tamatuma nassataanik siunissami perorsaanermik aallaavilimmik neqerooruteqarsinnaalissalluta inuusuttunut suliniutit pitsaanerusut anguniarlugit ingerlatsisinnaalissalluta, isumaginninnermut ataatsimiititap siulittaasua Malene Lynge (IA), tusagassiuutinut nalunaarummini oqarpoq.
Neqeroorutit arlallit
Inuusuttut inersimasutut imminnut isumagisutut ingerlalernissaannut piareersarneqarneranni tapersersuiniarluni ingerlatsivimmit aalajangiunneqarpoq Kammagiinni neqeroorutinik assigiinngitsunik pilersitsisoqarnissaa.
Ilaatigut makkuusunik: Nammineq angerlarsimaffeqalernissamut sungiusarneq (nerisassat, pisiniarneq, illup iluani suliassat, errorsineq), atuartinneqarnermik neqeroorutit, pillorissaasunik peqateqarluni sungiusarnernik neqeroorutit, ilinniaqqinnissamut ilitsersuinerit, inuusuttut sukisaarsartarfii, cafè aamma sannavinni sulinernik neqeroorutit.
- Allannguutikkut Kommuneqarfik Sermersooq inuusuttunut pitsassuarmik neqerooruteqalissaaq, inuusuttut kinaassusiannut naapertuuttoq aamma inersimasutut inuuneqalernissaannut pitsaanerusumik piareersarfiusinnaasoq.
Malene Lynge oqarpoq, nangillunilu:
- Inuusuttut sapinngisamik imminnut ikiorsinnaassapput. Perorsaanikkut anguniarneqassaaq inuusuttut ataqqineqarnermik misigisimalernissaat, ulluinnarni suliassanik isumaginninnerminni naleqartinneqarlutik aamma ulluinnaat nalinginnaasut ajunngitsumik ingerlanneqarsinnaanerannik misilittagaqalersinnerisigut.