avatangiisit

Sermersuup eqqakkanik immikkoortiterineq aallartippaa

Nuummi rådhusi maanna eqqakkat immikkoortunut arfinilinnut immikkoortiteraluni misiliilerpoq. Taassuma kingorna Nuup sinnerani assinganik immikkoortiterisarneq eqqunneqassaaq

Paamiuni eqqakkanik immikkoortiterineq aallartinneqarpoq

Rådhusimit eqqakkat immikkoortunut arfinilinnut assigiinngitsunut immikkoortinnissaat piviusunngortinneqarsinnaanerluni?

Sermersuup nammineq atorfilittaanit aamma politikeriinit misiliineq maanna aallartippoq.

Paamiut maligassiuisuuvoq, tassani 2014-imi ajornanngitsumik eqqakkanik immikkoortunut sisamanut immikkoortiterisoqartalerpoq.

Atuaruk: Paamiuni isumatusaartumik eqqagassalerineq

Maanna illoqarfimmi annerusumi eqqakkanik immikkoortiterineq ajornarnerusoq naammassineqarsinnaanersoq misilittarneqalerpoq.

Teknikkikkut aqutsisoqarfik piviusorsiortumik anguniagaqarluni aallartippoq, kisiannili angusaqarluarniarnissaq annertuneruvoq, kommunalbestyrelsi ilisimatitsivoq.

Nuuk aallartereerpoq
- Upperaara, aamma Inuit Ataqatigiinni upperaarput, nunarput nunarsuarmi minguinnerpaanngornissaminut periarfissaqartoq, Allan Pertti Frandsen (IA), Kommuneqarfik Sermersuumi politikeriusoq, tusagassiuutinut nalunaarummi allappoq.

- Angusaqarluareersimavugullumi. Taamaammat avatangiisit eqqarsaatigalugit immitsinnut piumaffigisinnaasariaqarpugut. Aamma inuussutissarsiut nutaaq pilersoq, mingutsitsinngitsoq, suliffissanillu nutaanik pilersitsisussaq eqqarsaatigalugu.

Immikkoortiterisoqassaaq
Kommunalbestyrelsi 2015-imi oktoberimi aalajangerpoq, kommunimi eqqagassanik immikkoortiterineq nukittorsarneqassasoq. Rådhusimi misilittakkat iluatsissappata, taava kommunip suliffeqarfiutaani allani eqqakkanik immikkoortiterisarneq eqqunneqarsinnaavoq.

Atuaruk: Ilulissat Aasiaallu nutaanik ikuallaavittaassapput

Nuup Rådhusiani pilersaarutaavoq, eqqakkat immikkoortunut arfinilinnut immikkoortiterneqassasut. Tamatumani pineqarlutik, pappiaqqat, igalaamerngit, savimerngit, eqqakkat arrortinneqarsinnaasut, eqqakkat allat, eqqakkallu ulorianartut.

Kommunilu immikkoortitanut tamanut pilersaaruteqarpoq:

  • Pappiaqqat, savimerngit, kiisalu eqqakkat ulorianartut, Danmarkimut suliareqqitassanngorlugit nassiunneqartassapput.
  • Igalaamerngit maani assaalluni nunagissaanermi atoqqinneqarsinnaassapput.
  • Arrortinneqarsinnaasut ataatsimut katersorneqartassapput, naggataatigullu issutut atorsinnaalissallutik.
  • Eqqagassat allat ikuallaavimmi ikuallaneqartassapput nukissiuutitullu atorlutik.

Siorna Sermersooq biilinik kallerup innitortunik marlunni, biilinillu hybrid-itortunik sisamanik pisaarpoq. Aamma anartarfilerinermi saliinermut atortut misiliutit pisaarineqarput.

Nunaqarfik atortulerneqassaaq
Anartarfilerinermi saliinermut atortut ukioq manna kommunip nunaqarfiini ikkussorneqassapput. Aamma Sermersuup kommunimi eqqaavissuarnik saliineq aallartissimavaa, siunertarineqarluni kingusinnerpaamik 2019-imi eqqaavissuit tamarmik salinneqarsimanissaat.

Kommunip januaarip aallaqqaataa aallarnerfigalugu Nuumi suliffeqarfinni anginerusuni ataatsiakkaani puiaasat immikkoortitertalernikuuaat.

Atuaruk: Nuummi januarip aallaqqaataani puiaasanik immikkoortitsineq aallartissaaq

Powered by Labrador CMS