Kommuneqarfik Sermersooq

Sermersuup avinneqarnissaa Demokraatinit isumaqatigineqanngilaq

Kommunalbestyrelsimi ilaasortap Tasiilamilu najugaqartup Justus Hansenip Tunup kommunitut namminersulernissaa isumaqatiginngilaa

Demokraatinit Justus Hansen

Tasiilap Kommuneqarfik Sermersuumit ilaasortaajunnaarsinniarlugu Egon Poulsen atsiornernik 300-nik katersisareerpoq.

Kommuneqarfik Sermersooq avinneqartariaqartoq Demokraatit nalunaaruteqarput.

- Eqqumiigaara Tunumiut immikkut kommuneqalernissaq illersorlugu atsiortitsiortortut ilassilluarsimammatigit. Nammineq misigisakka naapertorlugit kiffartuussineq Kommuneqarfik Sermersuumiilernitta kingorna qaffariarnikuuvoq malunnartumik. Malunnartupilussuuvoq aningaasarissaartumut pinerput iluaqutaalluarsimasoq, Kommuneqarfik Sermersuumi kommunalbestyrelsimi ilaasortaq Demokraatineersoq Justus Hansen tusagassiutinut nalunaarummi allappoq.

- Atsiortitsiortorneq isigaara Siumup Kommuneqarfik Sermersuumi avissaartuutsitsiniarneratut. Qaammatip siulianili Aningaasaqarnermut Naalakkersuisup nunaqarfimmiut ataatsimeersuarneranni siunnersuutigaa Tunu kaanngassasoq aamma ersittuunneqarsinnaagunanngilaq atsiortitsiortornermik aallarniisoq Egon Poulsen kingullermik kommunimut sassarnikuummat Siumut tunuliaqutaralugu, Justus Hansen oqarpoq.

Naalakkersuisuusimasut pisuussutaat
Kommuneqarfik Sermersuumi sipaartoqartussaanera Egon Poulsenimit isornartorsiorneqarpoq, sipaarniartoqartussaaneralu pissutigalugu Tasiilami inuit qulit missaat soraarsinneqassallutik.

Taamatut nassuiaasoqarnera Justus Hansenimit isumaqatigineqanngilaq.

- Eqqaasitsissutigisariaqarpara sipaaruteqarniarneq kommunerujussuanngortitsinermik aallaaveqanngilluinnarmat. Sipaarnissaq pisariaqarpoq, Naalakkersuisuusimasut (Siumut aamma Atassut) aalajangernikuummata naapertuutinngilluinnartumik naligiissaarinermut iluarsartuussiniarlutik, siunertaralugu Sermersuumiik kommuninut allanut aningaasanik nuussinissaq.

Egon Poulsen Kommuneqarfik Sermersuumi illoqarfinni tamani atsiornernik katersiniarpoq.

Powered by Labrador CMS