illoqarfittut ikinngutigiit
Sermersuup Aalborgillu suleqatigiissutaat arlaqartut
Kommuneqarfik Sermersuup Aalborgillu qanimut suleqatigiinnertik attatiinnarpaat
Ukiut marluk matuma siorna Nuummi Aalborgimut ulloqartitsineq ingerlanneqarmat, Kommuneqarfik Sermersuumi borgmesterimit, Asii Chemnitz Narupimit, aamma Aalborgip Kommuniani borgmesterimit, Thomas Kastrup-Larsenimit, illoqarfittut ikinngutigiit marluusut akornanni suleqatigiinnissaq pillugu pingaarnertut isumaqatigiissut atsiorneqarpoq.
Ullumikkut – ukiut marluk qaangiunneranni – killiffik imaappoq, kommunit taakku marluusut suleqatigiinnissamut suliassat 76-it pillugit isumaqatigiissusiorsimalerput.
Kommuneqarfik Sermersooq tusagassiuutinut nalunaarummi allappoq.
Atuaruk: Nuuk Tromsømut qanillattorusuppoq
Isumaqatigiissutaasup atsiorneqareernerata kingorna, Kalaallit Nunaanni kommunimut ataasiarluni qinersisoqareerpoq. Kommuneqarfik Sermersuumi kommunalbestyrelsimut qinersisoqarnerani ilaasortat nutaat 12-t iserput. Taamaammat kommunip ataatsimiititaani ataavartumi nutaami isumaqatigiissutip oqaluusereqqinneqarnissaa Asii Chemnitz Narupip kissaatigaa.
- Kommunitta marluk naleqartitaat assigiissorujussuupput, taakkulu politikkikkut suliaqarnitsinnik aallaaveqarlutik, tassanilu Kommuneqarfik Sermersuumi aamma Aalborgip Kommuniani innuttaasut pillugit sapinngisamik pitsaanerpaanik periarfissiinissaq pillugu sulilluta, borgmester Sii Chemnitz Narup (IA) tusagassiuutinut nalunaarummi oqarpoq.
Aammattaaq Aalborgip Kommuniata ataatsimiititaa ataavartoq isumaqatigiissutip misissoqqinnissaanik siunniussaqarpoq. Aatsaalli Danmarkimi kommunimut qinersisoqarnerani tamanna pissaaq. Tamannalu pissaaq ukioq manna novembarip ulluisa 21-anni, Sermersooq paasissutissiivoq.