kommunimi missingersuutit
Sermersuumut akileraarutitigut tunissutit 60 millionit koruunit
Akileraartarnermut Aqutsisoqarfiup ukiumi 2015-imi akileraarutitigut Kommuneqarfik Sermersooq qanoq amerlatigisunik isertitaqarnersoq paasivaa, kommunillu missingersuutigisimasaanit amerlanerujussuupput.
Illoqarfiit pingaarnersaata kommunia naatsorsuutigineqartup saniatigut 60 millionit koruuninik pissarsissasoq paasinarsivoq.
Saniatigut 60 + 17 millionit koruunit
Kommuneqarfik Sermersuumi kommunalbestyrelsimut ilaasortat juunip 13-anni ataatsimiinnerminni Akileraartarnermut Aqutsisoqarfimmit aamma Namminersorlutik Oqartussanit tunissimmut qilanaalereersinnaapput.
Kommunip karsia tassanngaannartumik sanigatigut 77 millionit koruunit missaanniittunik aningaasaateqartoq, oqaluuserisassani allaqqavoq.
Saniatigut isertitarineqartut inuit isertitaannit akileraarutinit saniatigut isertitat 40,942 millionit koruuniupput, tamatumalu saniatigut missingersuutigineqartunit 20 millionit koruuninik isertitaqarnerunermik iluanaarutisianit akileraarutaanissaat nalilerneqarput.
Tamatuma saniatigut aamma kommuni Namminersorlutik Oqartussanit tapiissutit ikinaarlugit missingersuisimavoq.
Kommunip 380 millionit koruuninik tapiissutinik pissarsinissaq naatsorsuutigisimagaluarpaa, kisianni taakku 17,8 millionit koruuninik amerlanerusussaapput, taamaalilluni tapiissutit 397,9 millionit koruuniussallutik.
Aningaasat taakku pisariaqartinneqarput, 40 millionit koruunillu atorfissaqartinneqalereerput, tamanna kommunalbestyrelsip tulliani ataatsimiinnissaanut pisariaqartitanik saniatigut aningaasaliiffigisassat allattorsimaffimmi aalajangiiffigisassani takuneqarsinnaavoq.
Sanaartorfigissagissaanermut akiliutit kukkuneqartut
Assersuutigalgu sanaartorfigissagissaanermut akiliutinit aningaasat pissarsiarineqartussat eqqoriarneqarneranni kommuni uniorujussuarsimasoq paasinarsivoq.
- 2017-imi isertitaqarnerunissamik isaasunit amerlanerujussuarnik kukkusumik missingersuusiortoqarsimavoq. Taamaattumik isertitanut missingersuutit 17,470 mio. koruuninik iluarsinissaat pisariaqarpoq, oqaluuserisassani tamanna atuarneqarsinnaavoq.
Nuup Bussiinut aamma saniatigut 2,567 millionit koruuninut tunniussisoqartariaqarpoq, ingerlatseqatigiiffik taamaalilluni bilitsit akii qaffannagit isumaqatigiissutaasut naapertorlugit ingerlasinnaaniaassammat.
Ininik attartorneq akisunerusoq
Aningaasartuutit ilimagineqartumit aamma amerlanerusussat ilagaat, sulisunut inissiat. Kommuni namminersortunut inissianik attartortariaqarsimavoq, tamannalu kommunip karsianut akisuvoq. Tamatumunngalu saniatigut 4,5 millionit koruuninik aningaasaliisoqartariaqarpoq.