sipaarniarnerit

Sermersuumi taama sipaarniartoqassaaq

Kommuneqarfik Sermersooq atuarfeqarnermut millionilikkaanik sipaarniassaaq

Atuartitsinermut atortut 10 procentimik sipaarniarfigineqassapput

Kommunip atuarfeqarnermut missingersuutaani 9,5 millioner koruunit missaannik sipaarniartoqarnissaa kommunalbestyrelsimit aalajangiunneqarpoq, tamannalu atuartitsinerup pitsaassusaanut kingunipiloqassasoq ernummatigineqalerpoq: Atuartut akunnerni ikinnerusuni atuartinneqartalissasut atuakkanillu ikinnerusunik pissarsisalissasut.

Kommuneqarfik Sermersuumi atuarfeqarnermut pisortaq, Hans Peter Broberg, ernummateqartunut erseqqissaassuteqarluni oqarpoq, meeqqat ikililerinernit toqqaannartumik killilerujussuarmik eqqugaassasut.

- Allaffissornermi 3,7 millioner koruunit sipaarniutigineqassapput, tamatumalu saniatigut ilinniartitsisut ilinniaqqittarneranni 3,6 millioner koruunit sipaarniutigineqassallutik. Tamanna pissaaq ilinniartitseqqittarnerit aggustimi 2014-imiit ukiup aappaani affarmi unitsinneqarallarnerisigut. Tamatuma saniatigut ilinniartitsisut aningaasarsiaannut aningaasartuutini tapinut, allaffissornermut qaangiuttoornernullu atorneqartartut 2,2 millioner koruunit sipaarniutigineqassapput, Hans Peter Broberg nassuiaavoq.

Sipaarniutissat tamarmiusut atuarfeqarnermut missingersuutit tamarmiusut 278 millioner koruuninik aningaasartaqartut 3 procenteriinnaraat taassuma ilanngullugu oqaatigaa.

- Atuartunut toqqaannartumik sunniutissat killilerneqarput atuartitsinermi atortussanik pisiniartarnermi 10 procentit sipaarniutigineqarnissaannut, ilisimatitsivoq.

Powered by Labrador CMS