soraarsitsinerit
Sermersuumi sulisut 75-it soraarsinneqarput
Naligiissaarinermut iluarsartuussinerugallartoq pissutigalugu Kommuneqarfik Sermersooq sulisunik 75-inik soraarsitsisariaqalerpoq, kommuni nalunaaruteqarpoq. Kommuni aamma allanik aalajangiussaqarpoq
Utaqqiisaagallartumik naligiissaarnermut iluarsartuussineq pissutigalugu Kommuneqarfik Sermersuumut annertuumik eqquivoq.
Sapaatip akunnerani tulliuttuni Kommuneqarfik Sermersuumi allaffimmiut 75-it nuanninngitsoq pillugu oqaloqatigineqarnissaannik aggersarneqassapput, Kommuneqarfik Sermersooq nalunaaruteqarpoq.
Aalajangiinerit
Naligiissaarinermut iluarsartuussinerugallartoq pissutigalugu, 2015-imi Kommuneqarfik Sermersooq 140 millionit koruuninik kommuninut naligiissaarutissanik akiliissaaq. Naligiissaarinermut nalinginnaasumut naleqqiullugu, 54 millionit koruuninik amerlanerupput.
- Kommunalbestyrelse sulisunik ikilisaassanngippat, kommune 2015–ip naanerani ukiumoortumik naatsorsuusiornermi 57 millionit koruuninik amigartooruteqassaaq. Kommunalbestyrelse qajassuarnerusumik pissuseqarumalluni missingersuutit naammassinnginneranni sulisunik ikilisaaniarluni aalajangerpoq, Kommuneqarfik Sermersuumi borgmesteri Asii Chemnitz Narup, Inuit Ataqatigiit, tusagassiutinut nalunaarummi oqarpoq.
Kommunalbestyrelsip marlunngormat soraarsitsinissat aalajangermagu peqataanik atorfinitsitsinerit unitsinneqarput taamatullu aamma siunnersortinik avataaniittunik atuineq aamma unitsinneqarpoq, Asii Chemnitz Narup nalunaaruteqarpoq.