isumaginninneq

Sermersuumi sulisunut saniatigut ajunngitsorsiassat

Nuup avataani isumaginnittoqarfinni sulisut sulisoriinnarniarlugit nutaanillu sulisoqalernissamut pilerisaariniarluni, Kommuneqarfik Sermersuumi aningaasaqarnermut ataatsimiititaliap saniatigut ajunngitsorsiusiiniarluni aalajangerpoq

- Paamiuni, Tasiilami Ittoqqortoormiinilu inunnik isumaginninnermi suliaqartunik ilinniarluarsimasunillu atorfinitsinniartarnerit taamatullu sulisooreersut tigummiinnarsinnaaneri unammillernartuusoq ilisimavarput, borgmesteri Asii Chemnitz Narup (IA) oqarpoq.

Nuup avataani illoqarfinni isumaginninnermi siunnersortinik, ilaqutariinnut siunnersortit, pillorissaasut, tarnip pissusaanik ilisimasaqartut, siunnersortit, utoqqarnut innarluutilinnullu peqqissaasunut isumaginninermilu siunnersortinut ikiortit aamma perorsaasut inunnik isumaginninnermi tarnikkullu erloqissutilinnik suliaqartut taamatullu innarluutilinnik suliaqartut atorfinitsitsinniarneqartarnerat Kommuneqarfik Sermersuumut unamminarluinnartuuvoq.

Illoqarfinni Tasiilami, Paamiuni Ittoqqortoormiinilu ajornartorsiut annerpaavoq, tusagassiuutinut nalunaarummi ilisimatitsissutigineqarpoq.

Maanna sulisut aamma sulisunngortussat uku iluaqutit pissarsiarisinnaavaat:

  • Sulisunik ataasiakkaanik qaammammut ataasiarluni ilitsersuisarneq + qaammat ataaseq allorlugu sulisunik tamanik ilitsersuisarneq + tassanngaannaq ajutoornermik nalaanneqarnermi immikkut ittumik ilitsersuisarneq

  • Ukiumut ataasiarluni akeqanngitsumik angalatitsisarneq

  • Sapaatip akunneranut ataasiarluni sulisut tamarmik nalunaaquttap akunnerani ataatsimi eqaarsaatinneqartarnerat imaluunniit sapaatip akunneri tamaasa CSR-imut nalunaaquttap akunnerani ataatsimi peqataaneq

  • Ukiumut ataasiarluni Nuummut paasisassarsiorneq, pisariaqartinneqarpallu Danmarkimi kommunit ilaanni suleqatinik suliamut tunngasunik paarlaasseqatigiinneq imaluunniit sullivinnik paarlaateqatigiinneq

  • Killissaleriikkamik atorfinitsitsinermik neqerooruteqarneq (ajornanngippat aningaasanik ukiumut ataasiarluni tigusartagassnik neqerooruteqarluni)

- Nuup avataani illoqarfinni allani sulisut pikkorissut sivisuumik sulinneqartassappata sulisussarsiornermilu tamakku neqeroorutigineqarpata Aningaasaqanermut ataatsimiititaliaq neriuuteqarpoq aaqqiissutissat iluaqutaajumaartut, borgmesteri Asii Chemnitz Narup tusagassiuutinut nalunaarummi oqarpoq.

Aaqqiissut siullermik ukiuni pingasuni atuukkallartussatut killilerneqarpoq.

Powered by Labrador CMS