soraarsitsinerit

Sermersuumi soraarsitsinerni periutsit atorneqartut peqatigiiffinnit oqariartuutigineqarpoq

Kommuneqarfik Sermersuumi atorfeqartut 47-t soraarsinneqarneranni periuserineqartoq peqatigiiffinnit assigiinngitsunit ingasagineqarpoq

Steffen Ulrich-Lynge

Kommuneqarfik Sermersuup aningaasaqarnera pissutaalluni sulisorineqartut 47-t soraarsinneqartut Sermitsiaq.AG-mi allaaserineqartareerpoq.

Soraarsitsinermi iliuuserineqartut naammaginagit peqatigiiffiit arfinillit tusagassiutinut nalunaaruteqarput.

Peqatigiiffinni AK-mi, ASG-mi, NPK-mi, PK-mi, SIK-mi aamma Imakimi siulittaasut Kommuneqarfik Sermersuumi borgmesteri Asii Chemnitz Narup, Inuit Ataqatigiit, isornartorsiorpaat.

'Soraarsitsiniarluni sioorasaarinermi allakkanik tunniussinermi periuseq nillertoq suusupaginnittorlu' atorneqarsimasut qisuariarput.

- Kommuneqarfik Sermersuup sulisuminut soraarsinniarneqartunut periuserisimasaa amiilaaralugu malinnaaffigisimavarput. Tamarmik assatik errortorusuppaat akisussaaffimmillu tigusiumanatik, atorfillit politikkikkullu aqutsisut. Soraarsinniakkatik isaasigut qiviarusunngilaat, peqatigiiffinni taaneqartuni ataatsimut tusagassiutinut nalunaaruteqarput.

Tusagassiutinut nalunaaruteqartuupput PK-mit Inuuti Fleischer, Kathrine Ødegaard ASG-mit, Dina Olsen AK-mit, Sivso Dorph Imakimit, Kaaliina Skifte NPK-mit kiisalu Jess G. Berthelsen SIK-mit.

Akuersaarneqarsinnaanngitsoq
Soraarsinniarneqartunut ilimasaarinninneq ima ingerlasarsimasoq oqaatigaat:

- Sila taarsigaangat tamarmillu suliffimminnit soraareeraangata, kommunip aattuisartuni illoqarfimmi angalatilersarpai eqqugaanerlussimasunut allakkanik pajutsillugit. Atorfeqartitap angerlarsimaffiata matua kasuttorneqartarpoq, allagaq soraarsitsiniarnermik sioorasaarinermik imalik tunniunneqarluni. Tamatuma kingorna aattuisartut ingerlaqqittarput.

- Pisuni arlalinni sulisoq kisermaaq qimaannarneqartarpoq, pineqarnini pillugu oqaloqatissaqanngitsoq. Sulisoqarnermi sinniisorisalluunniit allakkat tunniunneqarsimasut pillugit ilisimatinneqarneq ajorput, massa taakku toqqagaanerlussimasumut avatangiisileeqataasussaagaluartut. Sulisorisaq tupassimaqisoq kisimiittussanngorlugu qimanneqartarpoq. Ullutsinni nunatsinni qanoq taamatut pisoqarsinnaava?, tusagassiutinut nalunaaruteqartut aperipput.

- Amerlasuut sipaarniuteqarnissamut paasinnissinnaapput, kisianni kommunip sulisuminut soraarsinneqarnissaanik sioorasaakkaminut pissusilersornera akuersaarneqarsinnaanngilaq, ataqqinnissuseqarani amiilaarnarlunilu.

Eqqartorneqartut eqqoqqissaanngitsut
Borgmesterip Asii Chemnitz Narupip oqaatigaa saqqummiunneqartut Kommuneqarfik Sermersuup pisortaanerata Steffen Ulrich-Lyngep akisassarigai.

- Soraarsitsinissamut taamatut periuseqartoqarsimasoq uppernarsarsinnaaviuk?

- Eqqoqqissaanngilaq. Pineqartut pisortaat peqatigalugit qaaqquneqarput. Tassani soraarsitsinermut tunngaviusut saqqummiunneqarput. Allakkatigut soraarsitsinerunngilaq, paasisinnaavarali tamanna allaanerusutut isigineqannginnera, Steffen Ulrich-Lynge oqarpoq.

Periaaseq allanngortinneqassaaq
- Sooq soraarsitsinermut taamatut periuseqartoqarpa?

- Kommunimi ukiuni kingullerni taamaasiortoqartarpoq. Soraarsinneqartut suleqatimi saani nalunaarfigineqannginnissaat anguniarneqartarpoq.

- Periuserineqartut isornartorsiorneqarnerat qanoq oqaaseqarfigisinnaaviuk?

- Uanga aamma iluarinngilara. Sulisup pisortaata minnerpaamik isaatigut qiviarsinnaasariaqarpaa. Siunissami taanna periuseq atorneqaqqissanngitsoq sulissutigissavara, Steffen Ulrich-Lynge oqarpoq.

Powered by Labrador CMS