Sermersuumi soraarsitsinerit
Sermersuumi soraarsiortortitsisoqarnera Vittusimit isornartorsiorneqarpoq
Soraarsitsinermut tunngavilersuutaasut aningaasaqarnermut naalakkersuisumit Vittus Qujaukitsumit isumaqatigineqanngillat. Kommuneqarfik Sermersooq sulisunik 75-nik soraarsitsivoq
Utaqqiisaagallartumik naligiissaarnermut iluarsartuussineq pissutigalugu Kommuneqarfik Sermersuumut annertuumik eqquivoq, kommuni 75-nik soraarsitsisariaqalerneranik kinguneqartumik.
Kommunalbestyrelsip marlunngormat soraarsitsinissat aalajangermagu peqataanik atorfinitsitsinerit unitsinneqarput taamatullu aamma siunnersortinik avataaniittunik atuineq aamma unitsinneqarpoq.
Soraarsitsisoqarnissaa Kommuneqarfik Sermersuumit sisamanngornermi nalunaarutigineqarpoq. Kommunalbestyrelsip matoqqasumik ataatsimiinnermini marlunngormat tamanna aalajangiuppaa. Ataatsimiinnermi Siumumi Atassummilu kommunalbestyrelsimeersut Inuit Ataqatigiit Kanukokamit ilaasortaajunnaarnissaq pillugu siunnersuutaat akerleralugu ataatsimiittarfimmit aniapput.
Sermersooq nammineq pisuusoq
Nalimmassaarinermik aaqqissuussaagallartoq peqqutigineqarsinnaanngitsoq aningaasaqarnermut nunamullu namminermut naalakkersuisoq Vittus Qujaukitsoq Siumumeersoq oqarpoq.
- Maanna kommunep innuttaminut paatsiveerutitsiniarnera unitsittariaqalerpoq. Aningaasatigut torinngitsumik Kommuneqarfik Sermersuup kisimiilluni namminerlu akisussaaffigaa, ersarinnerusumik akisussaaffik qullasinnerpaami inissisimasuusoq kommunep aallaffissornikkut ingerlanneqarnera borgmester-ip akisussaaffigaa. Kommunep naatsorsueqqissaarfiata kommunep aningaasaqarnerani torinngitsuliornerpassui ersarissumik tikkuartuutigisimavaa, taamaalilluni toqqaannartumik kingunerivaa naalakkersuisoqarfimma qaammat marts-i aallartisimalereersoq tamanna immikkut eqqummaariffigilermagu, Vittus Qujaukitsoq oqaaseqarpoq.
Naatsorsueqqissaartarfiup saqqummiussaa kommunep 2013-imi amigartoorutai 48 million koruuniusut innersuutigaa. Taassumalu saniatigut kommunalbestyrelsep 2013-imi immikkut aningaasaliissutit 100 million koruuniusut tunniussimallugit, tassa siumoorluni naatsorsuutit sipporlugit.
Aningaasanut aqutsineq pitsaanngitsoq
- Kommuneqarfik Sermersuup maanna sipaarutissarilersimasai ajoraluartumillu sulisuminik innuttaasunillu eqquingaatsiarpoq, tamannalu pissuteqarpoq Kommuneqarfik Sermersuup aningaasatigut ingerlatsinermini amigarluinnartumik nakkutiginninnginnerminut. Tamannalu aqutsinerlunnerup kingunerisimavaa aningaasaateqarnerup 300 million koruuniusut katinneqartut, ukiup nikinnerani ukioq-manna 23 million koruuninut appariarnerat. Nakkutilliisut kiisalu kommunep naatsorsueqqissaartarfiata ukiuni arlalinni tikkuartuutigisarsimavaa, pissutsilli malinneqarsimanngillat aaqqinneqaratillu, aningaasaqarnermut naalakkersuisoq oqarpoq.