peqquserlunneq

Sermersuumi peqquserlunnginnissamut politikki nutaaq

Sulisut suliffeqarfinnit inuinnarnilluunniit tunissuteqarfigineqassanngillat, tunissut sulisup suliaanut attuumassuteqarpat

Steffen Ulrich-Lynge: - Pineqartumi erseqqarissunik malittarisassaqarutta pitsaaneruussaaq.

Kommuneqarfik Sermersuumi atorfillit aamma kimik tunissuteqarfigineqarnertik mianersuuttariaqassavaat. Kommunip peqqusserlunnginnissamut politikkiani akuersissutigineqaqqammersumi tamanna pingaarnertut taaneqarpoq. Tamanna kommunip nittartagaani tusagassiorfinnut nalunaarummi atuarneqarsinnaavoq.

Politikkip aamma naqissuserpaa kikkulluunniit sulisut suliffeqarfinnit inuinnarnilluunniit tunissuteqarfigineqassanngitsut, tunissut sulisup suliaanut attuumassuteqarpat imaluunniit kommunimi atorfeqarneranut tunngappat. Tamanna atuuppoq tigusisoq suliamik suliaqarsimappat suliaqarsimanngikkaluarpalluunniit.

- Isumaqanngilagut sulisuvut tamakkununnga pileritsatsinneqartartut, kisianni maani tassuunakkut erseqqaarissunik malittarisassaqarnerput pitsaanerussaaq, Kommuneqarfik Sermersuumi pisortaaneq Steffen Ulrich-Lynge oqarpoq.

Kommunimi sulisut nalliuttorsiualaarnernut atatillugu attaveqaatinit tunissutinik annikinnerusunik taamaallaat pisinnaapput.

Transparency Greenland Kalaallit Nunaanni peqquserluttarneq pillugu ukiut marlussuit matuma siorna misissuisitsivoq.

Powered by Labrador CMS