Sermersuumi meeqqat atuarfiisa qanoq kivinneqarnissaat takorluukkani qitiulluinnartut tallimat siunnerfigineqassapput

Taama politikkeqalernissap kommunalbestyrelsimit akuerineqarneranut tunngaviulluinnarpoq, meeqqat atuarnerminni pikkorissartuarnissaannik periarfissaasa pitsaanerpaanissaat aamma atuareernerminni ilinniagaqalernissaat.

’Meeqqat atuarfiat ataatsimoorullugu – ataatsimoorluta siunissaq pilersissavarput’ Kommuneqarfik Sermersuup atuarfeqarnermut politikkiani nutaami qulequtaqarineqarpoq.

Atuagarsornerup tungaatigut meeqqat toqqissisimasumik ineriartortinneqassapput aamma atuarfinni iluarusunnermik misigisaqassallutik, Kommuneqarfik Sermersuumi borgmesteri, Asii Chemnitz Narup (IA) oqarpoq.

Atuaruk: Sermersuup atuarfii angusarissaarnerupput

Ilinniartitsinerup naleqqussartuarneqarnissaa

- Atuagarsornikkut ineriartornermi piumasaqaataassaaq, ilinniartitsinerup ineriartuutaasumik pinissaa aamma atuartitsinerup naleqqussartuarneqarnissaa meeqqat ataasiakkaat pisinnaasaat aallavigineqarlutik. Tamanna aatsaat anguneqarsinnaavoq ilinniartitsisut pimoorussillutik sulippata aamma suliffimminnik nuannarinnippata. Pingaarnerpaavorli meeqqat atuarfiisa ataatsimoorussinikkut ineriartortinneqarnissaat, borgmesteri kommunip nittartagaani oqarpoq.

Atuarfeqarnermut politikki tallimanik imaattunik siunnerfeqarpoq:

• Meeqqat atuarfiat ammasoq aamma peqataatitsisoq, ataat­simut kivitseqatigiilluta
• Atuartut kalaallit piorsarsimassusaannik aallaaveqartumik nunarsuarmioqataa-sinnaanissaat
• Meeqqat atuarfiat atuartunik tamanik ilinniarnissamik sulisinnaanermillu piginnaanngorsaasoq
• Suliffiup avatangiisii pitsaasut – ataatsimoorussamik akisussaaffik
• Kikkut tamarmik toqqissisimasutut, pingaartinneqartutut naleqartutullu ulluinnarni misigisimanissaat

Atuarfeqarnermut politikki kommunalbestyrelsip novembarimi 2016-imi ataatsimiinnerminni akuersissutigaat.

Tamatumalu kingorna atuarfeqarnermut politikkissap pilersaarusiorneqarnera kommunip atuarfiini pisortat allalli soqutigisaqaqatigiit suleqatigalugit Meeqqanut, Ilaqutariinnut aamma Atuarfeqarnermut ingerlatsivik suliaqalerpoq.

Atuaruk: Meeqqat atuarfiata digitalinngorsarneqarnissaa ataqatigiissaarneqassaaq

Suleqatigiinnermut nukittorsaataassaaq

- Pilersaarut tamanna kommunalbestyrelsip ataatsimiinneranni kingullermi, tassa martsip 7-anni oqaluuserineqarmat iliuusissap pilersaarusiorallarneqarnera atuarfeqarnermullu politikkip atortussanngortinneqarnera akuersissutigineqarpoq. Pilersaarut aamma siunertaqarpoq sumiiffinni ataasiakkaani suliffeqarfiit atuarfiillu suleqatigiinnerisa nukittorsarneqarnissaa, Kommuneqarfik Sermersooq allappoq.

Suliniullu tamanna Paamiuni Atuarfik Tuiisami misiliutitut ingerlanneqarpoq. Tamassuma saniatigut suliniutit allat arfineq pingasut inerisarneqarneri ingerlanneqarlutik.

Atuaruk: Nivi Olsen: Atuarfitsialak atuutinngilaq