timmisartut
Sermersuarmit timmisartoq sorsuut aaniaraat
Timmisartunik nuannarisallit amerikamiut timmisartoq qaartartumeerutaat 1942-mili sermimiilersoq assanniarpaat
Timmisartunik nuannarisallit eqimattat amerikamiut timmisartuat qaartartumeerut P-38, Tunumi Sermersuarmit assallugu qaqinniarpaat, The Brisbane Times allappoq.
Aviisip suliniummi peqataasut ilaat, Leigh Atkinson, Australiameersoq apersorsimavaa. Taassuma ilisimatitsissutigaa, taanna timmisartoq Kulusummit 145 kilometerisut ungasitsigisumiittoq.
Ajornartoorluni mittariaqartoq
Taanna timmisartoq eqimattat P-38 qaartartumeerisartut arfinillit aamma B-17 timmisartut qaartartumeerutit marluk USA-mit 1942-mi Tuluit Nunaannut timmisut ilagaat.
Timmisartut tamarmik Tunumi sila pissutigalugu ajornartoorlutik mittariaqarsimapput. Kisianni inuttat 25-it tamarmik aniguipput kingusinnerusukkullu qimagussortinneqarput. Taakku timmisartut ilaat maanna assallugu peerneqalerpoq.
2011
Katillugu inuit timmisartunik nuannarisallit suliniummi 2011-mi aallartinneqartumi peqataapput. Taakkua sapaatip-akunneri sisamani sivisussusilimmi ilisimasassarsiorlutik Tunumeeqqammerput, ilaatigut containerit sulinermi atugassatik misilittarlugit.
Clacier Girl
Taakku timmisartut arfinillit ilaat , Clacier Girlimik taaguuserneqarsimasoq, 1992-imi qaqinneqarpoq USA-mullu timmisartuunneqarluni, tassanilu iluarsaanneqarluni. Ukiut qulit qaangiuttut timmisartoq tingisaleqqippoq, maannakkullu timmisartuni takutitsinernut atatillugu ilaasarpoq.