Piffiit nutaat
Sermersuarmik nungusaaqataasoq alla unaavoq
Pingaartumik ukiassalernerani ukiakkullu siallerujussuaraangat nunatta sermersua aakkiartornerulersarpoq, sermersuup sinaa annikinnerulerluni
Siallerujussuartarnera Kalaallit Nunaata sermersuanut annertuumik sunniuteqartarsinnaavoq, sialuk sermip ataani qaarsumut kuukkaangat. Tamanna atuagassiami Nature Geoscience-mi allaaserisami, DMI-p sumiiffimmi silap pissusianut takussutissiaanit, taaguuteqartumit HIRHAMS, peqataaffigineqartumi atuarneqarsinnaavoq.
– Sunniuteqarnerpaasarpoq ukiassakkut ukiakkullu, sermersuup qaava aputeqarpianngikkaangat silalu suli nerumalluni, sermersuullu qullasinnersaani sialleraangat. Tamatuma saniatigut sermip ataani sermip aanneranit kuuit, sermip aasaanerani aannerata imaanut aqqutaat, ukiup taamaasinerani matujartulersarput, Ruth Mottream, DMI-mi glaciologi misissuinermik allaaserinneqataasorlu oqarpoq.
Sermip ingerlanera sukkatsippaa
– Sialuk sermillu aannera sermersuup ataani qaarsumut pigaangami sermip sinaanut sukkasumik aqqutissaqarneq ajorpoq. Taamaasilluni erngup naqitsinerujussua pilersarpoq, sermerlu kivillugu ingerlarnga sukkatsittarlugu. Sermip erngerlarngata taamatut sukkatsinnera pissutigalugu sermip sinaa kinguariartornerulersarpoq, Ruth Mottram oqarpoq.
Misissuinermi sunniutai isiginnaarneqarput 2011-mi aggustimi septembarimilu, tamatumani Kujataani Kitaanilu sermip ilarujussua attorneqarsimalluni.
– Ukiuni qulikkaani kingullerni sermersuup qullasinnerusua siusinnerusumit siallernerusarsimavoq, silap pissusianik ilisimatooq Peter Langen, DMI-meersoq, oqarpoq nangillunilu:
– Siilap pissusianik siumut eqqoriaanitta ilimanarsisippaa sila kissatsikkiartorneruppat sermersuullu ilaa annertunerusoq siallernerusalerpat, tamatuma sunniutaa pingaarutilerujussuanngorsinnaasoq.
Allaaserisaq una ilanngunneqarpoq DMI isumaqatigiissuteqarfigalugu. Oqaluttuaq dmi.dk-mi ilanngunneqarsimavoq Marianne Brandtimillu allanneqarsimalluni. Taanna dmi.dk-mut ilanngunneqarpoq juulip 14-ianni.