Sermersooq utoqqarnut politikkeqalertoq

Kommuneqarfik Sermersuup ukiunut tulliuttunut qulinut utoqqarnut politikki piareerpaa. Utoqqarnut politikki Utoqqarnut Siunnersuisoqatigiit suleqatigalugit pilersinneqarpoq.

Ukiuni marlunni kingullerni Tasiilami, Ittoqqortoormiini Nuummi Paamiunilu innuttaasunik ataatsimiisitsisoqartarpoq. Ataatsimiisitsinerni innuttaasut utoqqarnut politikkissamut isumassarsiaminnik immersueqataasarput.

Paasinninnermik pilersitsineq
Uani sapaatip akunnerani kommunalbestyrelsip utoqqarnut politikki akuersissutigaa, qulequtaritillugu 'ataqqinartumik eqeersimaarfiusumillu inuuneqarneq'.

Utoqqaat pillugit politikkimi utoqqaat tungaasigut suliap ingerlaqqinnerani unammilligassatigut, pisariaqartitatigut, najoqqutassatigut, anguniakkatigullu ataatsimut paaseqatigiinnissamik pilersitsinikkut najoqqutassanik siunnerfinnillu aalajangersaanissaq siunertarineqartoq, Sermersooq ilisimatitsivoq.

Utoqqaat pillugit politikkimi immikkoortumi suliniuteqarneq pingaartinneqassaaq, aamma anguniakkat atorneqarsinnaasut piviusunngortinneqarsinnaasullu aalajangersaavigineqassapput, taamaalilluni innuttaasunut, suleqatinut, kattuffinnullu najoqqutassatut atorneqarsinnaassalluni.

Utoqqarnut isumassiuineq
- Toqqissisimanartumik naleqartitsisumillu utoqqarnut isumassuineq ataatsimut anguniakkatut anguniarlugu politikkikkut aqqutissaqarnissaq pisariaqartipparput, tassani periarfissat saaffissallu saniatigullu unammillernartunut, pisariaqartitanut killigititanullu paasinninnermik suliassaqarnitsinnik periarfissaqaannarniarluta, tassanilu Utoqqaat pillugit Politikki tamatsinnut ataqatigiisitsisuussaaq, Malene Lynge, Kommuneqarfik Sermersuumi atugarissaarnermut ataatsimiititaliami siulittaasoq oqarpoq.

Immikkut utoqqarnut politikkip saniatigut aamma utoqqarnut suliassaqarfimmi pilersaarusiamik suliaqartoqarpoq. Utoqqarnut politikkeqarnermi anguniakkat piviusut oqaatigineqarnerini immikkoortumut pilersaarummi politikkikkut anguniakkat qanoq piviusunngortinneqarnissaat pillugu oqaatigineqassapput.