Tunu

Sermersooq: Tunumi qimmit akornanni nappaalasoqanngilaq

Avannaani qimmit nappaataannik nappaalasoqarnera tunngavigalugu Kommuneqarfik Sermersooq Tunumi taamatut assingusumik tunillaassuuttoqarnissaanut ernumanartoqarnersoq misissuisitsivoq

Tunumi qimmit qimuttut akornanni nappaalasoqanngilaq, ilisimatitsivoq Kommuneqarfik Sermersooq

Avannaani Qeqertami qimmit akornanni qimmit nappaataannik tunillaassuuttoqarpoq, qimmit 70-t sinneqartut inuunerannik tamanna naleqartitsivoq.

Tassunga atatillugu Kommuneqarfik Sermersuup, Tunumi qimmit aamma napparsimanersut misissorpaa.

Qimmit qimuttut akornanni napparsimasoqanngilaq, kommuni ilisimatitsivoq.

Ukiuni qulini qimmit nappaateqanngitsut
Kommuneqarfik Sermersuumi Tunumi qimminut tunngasunik akisussaasoq, Tasiilami Materialegårdenimi ingerlatsinermut aqutsisoq Ulrik Gaffuri oqarpoq, qimmit nappaataannut, perlerornermut parvovirusimullu akiuussutissamik kapoorineq Tasiilami Ittoqqortoormiinilu qimmilerisunik akisussaasut suleqatigalugit ingerlanneqassasoq.

- Avannaani maannakkut atugaasoq, Tunu tamakkerlugu qimmini qimuttuni qimmit nappaataat allatulluunniit virusimik nappaalaneq, ukiuni kingullerni qulini nalaanneqarnikuunngilaq, Ulrik Gaffuri kommuni naapertorlugu oqarpoq.

Tunumi qimmilerisutut akisussaasut qimmiaqqat pingasuniit arfinilinnik qaammatillit aallaavigalugit akiuussutissalersuissapput, kingornalu ukiut pingasukkaalissallutik.

Atuaruk: Qimmit 70-it qimmit nappaataannik toqupput

Illoqarfiit nunaqarfittaat tamaasa tikittaraat
Saniatigut aamma ilisimatitsissutigineqarpoq, Tasiilami Ittoqqoortoormiinilu kommunimi qimmilerisutut akisussaasut isumagissavaat, akiuussutissalersuineq pisariaqartoq isumaginiarlugu illoqarfiit nunaqarfii tamakkerlugit tikillugit qimmit qimuttut tamaasa akiuussutissamik kapoorneqarnissaat.

Qimminik qimuttunik qimmit nappaataannut, perlerornermut parvovirusimullu akiuussutissalersuineq kommunip suliassaraa, tamannalu tunngaviatigut qimmiutilimmut akeqassanngilaq. Kisianni Kommuneqarfik Sermersuumiit maluginiaqquneqarpoq, qimmiutillip nammineq pisussaaffigimmagu qimmit akiuussutissamik kapineqarnissaa pillugu kommunimi qimmilerisunut attaveqassalluni.

Atuaruk: Qimmit nappaataannut akiuussutissamik amigaateqartut

Powered by Labrador CMS