Arctic Winter Games
Sermersooq: Taamaattumik biatlon-ertarfik AWG sioqqullugu atukkiutinngilarput
Kommuneqarfik Sermersuup tikkuarpaa issittormiut unammiuaarnissaannut unammisarfiup atorsinnaanissaa kommunip akisussaaffigigaa
Kalaallit Nunaata biatlonimi peqataatituaanut, 14-inik ukiulimmut Ukaleq Slettemarkimut, Arctic Winter Games sioqqullugu Nuummi sungiusarniarneq imaannaasimanngilaq.
Ooqattaasartakkat
Taamaasilluni ooqattaasartakkat, unammiuaarnissat sioqqullugit Kommuneqarfik Sermersuup ikkussorsimasai, atorneqarsinnaasimanngillat. Tamannarpiarlu aamma pissutigalugu unammissummi tassani peqataasussat pingasut ataasiinnanngortinneqarsimapput. Allat marluk sisoraatinik oqilaniunnermut nuunneqarput.
– Sungiusarnissaq ajornakusoortorujussuusimavoq. Tassami ooqattaasaatigaluni sisoraatinik oqilaniunnermi 50 procentia sisoraatinik arpannerusarpoq, 50 procentialu ooqattaasarnerusarluni. Taamaattumik pakatsinaqaaq ooqattaasarnermi sungiusarsinnaasimannginnatta, nunanut allanut unammisartut sungiusaasuat Uiloq Slettemark siusinnerusukkut Sermitsiaq.AG-mut oqarnikuuvoq.
Pissutaasut marluk
Kommuneqarfik Sermersooq tamatumunnga oqaaseqaateqaqqullugu qinnuigisimavarput. Tassanilu attaveqarnermut pisortap Lars Damkjærip ooqattaasartarfiup atorneqarsinnaannginneranut pissutaasut marluk tikkuarpai.
– Kommunip suliassadra biatlonimik unammisarfiup Arctic Winter Gamesimi atorsinnaanissaa. Taamaattumillu unamminerit aallartitsinnagit atukkiukkusissimanngilarput. Aammami unammisarfik imaasiallaannaq atorneqarsinnaanngilaq. Tassami pinerit tamaasa piffissami killilimmi ooqattaasarnissamut politiinit akuersissummik peqqaartariaqarpoq, attaveqarnermut pisortaq paasissutissiivoq.