ikiorsiisarneq
Sermersooq Nuuk TV-mut naqqiissuteqartoq
Kommuneqarfik Sermersuumi utoqqaat tamarmik eqqiaasoqarnissaanik atorfissaqartitsisut suli sullinneqartassasut kommuni nalunaarpoq
- Matumuuna Kommuneqarfik Sermersuup erseqqissaatigissavaa, innuttaasut utoqqaat tamarmik eqqiaassunneqarnissaminnik pisariaqartitsisut taamatut ikiorneqartuaannassammata.
Kommuneqarfik Sermersuumit tusagassiutinut nalunaaruteqartoqarpoq.
Nuuk TV-mi marlunngormat saqqummiunneqartoq pillugu nassiunneqartoq tunngassuteqarluni.
- Tamassuma erseqqissaatiginissaanut pissutaavoq, eqqiaassunneqartarnerup sipaarutaasimaneranik oqallittoqarsimanera. Tamanna eqqunngilaq. Eqqortoq tassaavoq, utoqqaat tamarmik ullumikkut eqqiaassunneqartartut, upernaap ingerlanerani angerlarsimaffiannut pulaarneqassapput, taamanikkussamullu ataasiakkaat eqqiaassunneqartarnissamik pisariaqartitaat nalilersuiffigineqassapput. Kommunalbestyrelsip ISS-imit eqqiaassunneqartarnerup kommunimit isumagineqalernissaanik aalajangerneranik tamanna tunngaveqarpoq. Allatut oqaatigalugu, eqqiaassunneqarnissamik pisariaqartitsisut tamarmik eqqiaassunneqartarnerat ingerlatiinnarneqassaaq.
ISS-imit eqqiaassuuneqartarnerup kommunimit isumagineqalernissaa pillugu kommunalbestyrelsip isumaqatigiissup 2014-imut missingersuutissat akuersissutiginerinut atatillugu akuersissutigaa.
- Imaanngilaq eqqiaassisarnerup kommunimit isumagineqartalernissaa sipaarniarnermik annertuumik peqquteqartoq. Kommuneqarfik Sermersuumut pingaarutilipilussuuvoq erseqqissassallugu, innuttaasut utoqqaat tamarmik, eqqiaassunneqarnissaminnik pisariaqartitsisut eqqiaassunneqartuarnissaat. Taamaallaalli juulip aallaqqaataat 2014-imit kommunip nammineq sulisuinit tamanna isumagineqartalissaaq, Kommuneqarfik Sermersooq nalunaarpoq.
Ikiuisarnerit
- Imaakkami, peqqissuserput allanngorartuartuuvoq. Ilaannikkut ajorseriartarpoq, kisianni qujanartumik aamma pitsanngoraluttuinnartartunik assersuutissaqartarpoq. Atugartuussutsimi innuttaasut uagutsitut ittut eqqarsaatigalugit pingaaruteqartorujussuuvoq, pisariaqartitsisut kikkut tamaasa uagut kommunitut ikiussallugit. Kisiannili aamma peqataanik, nammineersinnaasut, imminnut isumagisinnaanissaat pingaaruteqarpoq. Taamaasiornikkut qulakkiissavarput, pisariaqartitsisunut ikiorsiinissarput taakkununnga sammitinneqassammat, Kommuneqarfik Sermersuumi Isumaginninnermut, Suliffeqarnermut Inuussutissarsiornermullu Ingerlatsivimmi pisortaq Grethe H. Nielsen nassuiaavoq nangillunilu:
- Suliami matumani pineqartumi eqqartorneqartoq tassaavoq, innuttaasut utoqqaat angerlarsimaffiini eqqiaassussisarnerup kommunip nammineq isumagisassarilermagu. Tamatumunnga atatillugu innuttaasut utoqqaat, ullumikkut angerlarsimaffimminni eqqiaassunneqartartut upernaap ingerlanerani pulaarneqassapput, ataqqinnittumillu oqaloqatigiinnikkut eqqiaassunneqartarnissamik pisariaqartitsineq pillugu oqaloqatigineqassallutik.
Juunip 30-ata tungaanut ISS eqqiaanermik isumaginnittuugallassaaq, tamatuma kingornagut kommunip nammineq sulisuinit eqqiaassunneqartarneq isumagineqalissaaq.