Annertuumik pisiortorneq
Sermersooq neqerooruteqartitsissaaq
Annertunerusumik pisiortortarfiit 11-t upernaap ingerlanerani suliarinnittussarsiuunneqassapput. Millionilinnik sipaaruteqarnissani kommunip naatsorsuutigaa
Kommuneqarfik Sermersuup ukiuni kingullerni samminiarsimavaa kommuni qanoq isilluni nioqqutissanik kiffartuussinernillu pisiortortassanersoq.
Pisiortornermut politikki
Kommunalbestyrelsip pisiortornermut politikki siorna akuersissutigaa, tassuunalu erseqqissarneqarpoq akileraartartut aningaasaataat sapinngisamik silatuumik atorneqartassasut, tamannalu peqatigalugu kommunip pisiortornera kommunimi suliffinnik inuussutissarsiornermilu periarfissanik pilersitsissasoq.
Immikkut immikkoortoqarfik
Kommuneqarfik Sermersooq pisiortornermut immikkoortoqarfimmik pilersitsisimavoq, taassumalu ullumikkut kommunip annertunerusumik pisiortorneri tamaasa isumagisalereerpai. Tamannalu peqatigalugu Kommuneqarfik Sermersuup annertunerusumik pisiortortarfiit 11-it upernaap ingerlanerani suliarinnittussarsiuutissavai. Tamakkua ilaatigut tassaapput sillimmasiinerit, eqqiaaneq ikummatissamillu pisiortorneq, kommuni paasissutissiivoq.
Unneqqarissumik ingerlatsineq
– Isumaqatigiissutinik tunniussineq ammasumik unneqqarissumillu pisassaaq, suliamik tunniussinissamut ersarissunik tunngavissaqartitislluni, tamakkualu tassaanerusarput neqeroorutit aningaasatigut iluaqutissartaqarnerpaat, ataani tunngaviusunik piumasaqaatitallit, assersuutigalugu akianut, pitsaassusianut kiffartuussinermullu. Uagutsinnut pingaaruteqarpoq piffissaq ungasinnerusoq isigalugu kommunimut pitsaanerpaamik niuernissaq, pisiortornermut pisortaq Gerth Jakobsen tusagassiorfinnut nalunaarutikkut erseqqissaavoq.
Maalaarut
Sulisitsisut Peqatiiiffiata (GE-p) ulluunerani paaqqinnittarfinnut pisiortornermut isumaqatigiissut qanittukkut maalaarutigaa, isumaqatigiissut kommunimut millionilinnik sipaaruteqarfiugaluartoq.
Piffissaa killilerlugu isumaqatigiissut piareersaatitut suliniutaavoq, tassuuna qulaajarneqassalluni kommunip pisiortornermigut aningaasatigut sipaaruteqarnissamut periarfissai, GE-li isumaqarpoq suliassaq taanna suliarinnittussarsiuunneqarsimasariaqaraluartoq.
Tupigusuutigaa
Tunngavilersuutaali Kommuneqarfik Sermersuumi pisiortornermut pisortap tupigusuutigaa.
– Piareersaataasumik suliniut GE-p ilisimareerpaa, tassuuna siunertarineqarluni ulluunerani paaqqinnittarfinnut ataatsimut pisiortornerit, suuliluunniit aallartinneqannginnerani, suliarinnittussarsiuunneqarnissaa. Suliniut aallartikkatsigu suliarinnittussarsiuussinermut atortussanik sanasinnaasimanngilagut, tassa taamaallaat ilisimasimagatsigu ulluunerani paaqqinnittarfiit ataasiakkaat pisiortornermut aningaasat qanoq amerlatigisut atortaraat. Suut pisiarisarneraat ilisimanatigu, Gerth Jakobsen oqarpoq.
Kisitsisitigut takussutissat
Tssami pilersuisunik isumaqatigiissuteqarnernermut ilaavoq kommuni kisitsisitigut paasissutissanik akeqanngitsumik pissasoq, tamakkua siunissami suliarinnittussarsiuussinermut tunngaviussammata.
– Paasissutissat tamakkua nammineq katersussagutsigit ikinnerpaamik millionip affaanik akeqassagaluarput. Tamanna peqatigalugu piareersaataasumik suliniummi 8 procentit 12 procentillu akornanni sipaarutissatut naatsorsuutigisavut kommunip annaassagaluarpai, Gerth Jakobsen oqaluttuarpoq.
Oqaloqatigiilluni ataatsimiinnerit
Siunissami kommunip suliarinnittussarsiuussai tamarmik kommunip nittartagaatigut tusagassiorfitsigullu saqqummiunneqartassapput. Aammalu pisiortornermut suliarinnittussarsiuussassat 11-t suliarinnittussarsiuunneqannginneranni inuussutissarsiortut suliarinnittussarsiuussinissaq pillugu oqaloqatigiilluni ataatsimiinnissamut qaaqquneqassapput.