Sermersooq: Nalornissuteqalersitsisunik oqaaseqartoqarpoq

Kommuneqarfik Sermersuup atuarfeqarfinnut 10,5 million koruuninik sipaarniarnissaa akerleralugu februaarip 20-ani ilinniartitsisut angajoqqaajusullu akerliussutsimik takutitsipput.

Kommuneqarfik Sermersuumit nalunaarutigineqarpoq ilinniartitsisunillu Imakimiillu oqariartuutigineqartut ilaat eqqortuunngitsut.

- Ilinniartitsisut sinniisaat Imakillu siulittaasuat assigiinngitsunik oqaaseqarput, atuarfeqarnermut tunngasunik nalornissuteqalersitsisunik:

• Oqaatigineqartoq siulleq

”MISI-mi atorfiit 25procentii atorunnaarsippasi”

Piviusut:
2014-imut missingersuutit akuersissutigineqarnerinut atatillugu kommunalbestyrelsip aalajangerpaa MISI-mut tunngatillugu 300.000 koruuniinik sinaakkutissatut sipaaruteqartoqassasoq, atorfinnit 16-init atorfiup ataatsip nalinga. Taamaasilluni 2014-imut MISI-mut missingersuutit 8,2 mio. koruuninik amerlassuseqalerput.

Ingerlatsiviup oqaaseqaatai:
2013-imi atuinerup takutippaa, missingersuutinut sanilliullugu aningaasarsianut atuinerusoqarsimasoq, taamaattumik qulaani taaneqartumik sipaaruteqarnerup saniatigut atorfimmik ataatsimik suli, 2014-imut missingersuutitigut sippuinissaq pinaveersaarniarlugu sulisut ikilisinneqartariaqarsimapput.

Atorfiit qulaani taaneqartut ikilisinnerisa kingunerisimavaa, oqalunniarnermut ilitsersuisutut aammalu isumaginninnermi siunnersortitut atorfiit atorunnaarsinneqarnissaat.

Taakku saniatigut nammineq soraartoqarneratigut atorfiit marluk inuttaqanngitsut pigineqalerput, allaffimmiutut (HK) aamma tarnip pissusiinik ilisimasalittut.

Taakku inuttaleqqinneqarnissaannut tunngatillugu siullermik MISIp aaqqissuussaanera/ilinniarsimasunik pisariaqartitsinera maannakkut misissoqqissaarneqartoq, aappaatullu Meeqqanut, Ilaqutariinnut Atuarfeqarnermullu Ingerlatsiviup sinnerata ataatsimoortinneqarnissaa utaqqimaarneqarpoq, taamanikkussamut stabit nalilersoqqinneqartussaammata.

Atorfiit inuttaleqqinneqassanersut 2014-ip qiteqqunnerani isummerfigineqarumaarpoq.
Taamaattumik atorfiit sisamat atorunnaarsinneqanngillat, kisialli marluk.

• Oqaatigineqartup aappaa:

”Ilinniartitsisut 16-it soraarsinneqassapput”

Piviusut:

Ilinniartitsisut tiimiinik tigussaasumik ikililerinerit, 2014-imut missingersuusiornermut atatillugu akuersissutigineqartut, ilinniartitsisut 16-it ukiumut aningaasarsiaasa amerlaqatigaat.

Ingerlatsiviup oqaaseqaatai:
Taamatut ikililerineq nammineq soraartoqartarneratigut anguneqarsinnaasoq Ingerlatsiviup naatsorsuutigaa, aammalu ilinniartitsisut qaangiuttoornerisa annertuumik ikililerneqarnissaat.Taamaattumik atorfinitsitsisarnerit unitsinneqarput.
”Nammineq soraarneq” pineqartillugu eqqarsaatigineqarpoq, ilinniartitsisut nammineerlutik atorfimminnit soraarniuteqartut (soraarninngorneq, allamut nuunneq il.il.) pissutigalugit, imaluunniit piffissami aalajangersimasumi atorfeqartitaaneq, sivitsorneqarsinnaanngitsoq eqqarsaatigalugit.
Taamaattumik soraarsitsisoqarnissaa Ingerlatsiviup naatsorsuutiginngilaa.

• Oqaatigineqartut pingajuat:

”Ilinniartitsisut Nuup avataanut atuarfinnut nuutikkusunneqanngippata soraarsitaanissaannik Ingerlatsivik sioorasaarivoq”

Piviusut:
Ilinniartitsisut tamarmik kommunimi tamarmi atorfeqartinneqarput.

Ingerlatsiviup oqaaseqaatai:
Ingerlatsivik kikkunnilluunniit sioorasaarinngilaq.

Aasaanerani sulinngiffeqareernerup kingorna najukkami ingerlatsiviup ilimagisai uniorlugit atorfinnik inuttaqanngitsoqassagaluarpat, kommunimi atuarfiit ilaannut nuutinneqarnissamik neqeroorfigitittoqariaannaasoq oqaatigineqarnikuuvoq.
Taamaattumik sioorasaarisoqanngilaq, kisiannili atorfeqartitaanermi atugassarititaasut allannguuteqarsinnaanerat oqaatigineqaannarpoq.
Marsip qiteqqunnerani atuarfinni tamani ukiumi atuarfiusumi 2014/15-imi ilinniartitsisunik qassinik pisariaqartitsisoqarnersoq Ingerlatsiviup naatsorsoqqissaassavaa.

• Oqaatigineqartut sisamaat:

”Ilinniartitsisut ilinniaqqissinnaanerannut tunngasut kommunip tamaasa peersimavai.
2002-mi isumaqatigiissut kommunip unioqqutippaa.”

Piviusut:
Ukiumi atuarfiusumi 2014/15-imi pikkorissarnissanut -/ilinniaqqinnissanullu aningaasaliissuteqartoqarnissaa unitsinneqarnikuuvoq.
Kalaallit Nunaanni Naalakkersuisut, KANUKOKAp IMAKillu akornanni Meeqqat atuarfiini il.il. ilinniartitsisut pisortallu atorfinitsinneqartarnerinut soraarsinneqartarnerinullu oqartussaanerup Kalaallit Nunaata Naalakkersuisuinit Kalaallit Nunaanni Kommuninut nuunneqarnissaa pillugu isumaqatigiissut nr. 2, 5. januar 2001-imeersumi allassimavoq, ….”peqatigitillugu pikkorissarnerit ilinniarnerillu suleqataasunut ataasiakkaanut inuttut sulinerullu sivitsoriartornerani sannginerulersitsisinnaasut periarfissiivigineqassapput.” aamma ”Namminersorlutik Oqartussat kommunellu sulissutigerusuppaat ilinniartitsisunut sortanullu ilinniartitseqqittarnissanut ilinniagaqartitseqqittarnissanullu massakkumut nukinnik atuisarnerit minnerpaamik aalajangiusimaannarneqarnissaat.”

• Ingerlatsiviup oqaaseqaatai:

2014-imut ukiumut missingersuusiorfiusumi ilinniaqqinnerit ilinniagaqaqqitsitaanerillu aammalu pikkorissarnerit, ukioq naallugu sulisut 13-it aningaasarsiaasa 4.950 mio. koruunit missaannik amerlaqataannut akuersissutigineqarput.
2015-imut ukiumut missingersuusiorfiusumut tunngatillugu atuarfeqarnermut immikkoortortap, nalilersuinerup qanoq inerneqarnissaa apeqqutaatinnagu, inassuteqaatiginiarpaa, sulisut qulingiluat ukioq naallugu sulisartut aningaasarsiaasa nalingannut 3.420 koruunit missaasa nalingannut pikkorissartitsinissamut ilinniagaqaqqitsitaanissamullu akuersissutigineqarnissaat.
2014-imut aamma 2015-imut pikkorissarnissamut ilinniagaqaqqinnissamullu amerlalluinnartunik 2014-imut 2015-imullu immikkoortitsisoqareermat, Ingerlatsivik isumaqarpoq isumaqatigiissutinik unioqqutitsisoqarsimanngitsoq.
Siusinnerusukkut ilinniagaqareerneq aqqutigalugu pigineqareersut pillugit Ingerlatsivik piginnaasat allattorsimaffiannik suliaqarniarpoq.
Taamatuttaaq piginnaasat ineriartortinneqarnissaannut pisariaqartitsineq misissuiffigineqassaaq. Tamatuma atuarfeqarneq tamakkerlugu ilinniagaqaqqittarnissamut periusissaliortoqarnissaa kingunerissavaa.
Ilinniagaqarnissamik unitsitsinerup kingunerisaanik immikkut akueritoqqarsinnaanersoq erseqqissumik isummerfigineqarumaarpoq.
Ilinniartitsisut namminneq piffissaminni modulinik naammassinninnissaminnik kissaateqarnerat Ingerlatsiviup akerliuffissaqartinngilaa.
IMAKip ”sulianut tunngatillugu inatsisitigut kinguneqartitsinissaq” sioorasaarutigimmagu kommunip tusaatissatut tiguaa.
Apeqqutip tassunga tunngasup eqqartuussissuserisutsinnut tunniunneqarnissaa kommunip sillimaffigeqquaa.

• Oqaatigineqartut tallimaat:

”Ingerlatsivik isumaqatigiissutinik unioqqutitsivoq, ikililerinerit Suleqatigiinnissamut Ataatsimiititaliami eqqartorneqarsimanngimmata.

Piviusut:
Kommunip pingaarnertut Suleqatigiinnissamut Ataatsimiititaliaa 2014-imut missingersuutit pillugit decembarip pingajuani 2013-imi ataatsimiinnermi ilisimatinneqarpoq, taamanikkullu sinniisuunerit aamma kaammattorneqarput ilaasortaminnut saaffiginneqqissasut, sipaarutissatullu siunnersuutitsialaqartoqassanersoq eqqartortillugu.
Sulisut tamarmik (atuarfinni Suleqatigiinnissamut Ataatsimiititaliaq ilanngullugu) missingersuusiornissap tungaanut tusarniaanermi akissuteqarnissaminnut periarfissinneqarsimapput.

Ingerlatsiviup oqaaseqaatai:
Atuarfeqarnermut immikkoortoq isumaqarpoq, Suleqatigiinnissamut Ataatsimiititaliaqarnermut tunngatillugu kommunip pisussaaffini naammassisimagai.
Pingaarnertut Suleqatigiinnissamik Ataatsimiititaliaq missingersuutit pillugit ilisimatinneqarsimavoq, IMAKillu sinniisuutitaa pingaarnertut eqqaaneqartut apuunnissaannut periarfissinneqareersimalluni.
Atuarfinni Suleqatigiinnissamut Ataatsimiititaliat missingersuutini pingaarnertut akuersissutigineqartut imminerminni nalunaarutigineqarnerat najoqqutarisussaavaat. Suliap ingerlaarnera tamanna upernaamut, ukiup atuarfiusussap 2014/2015-ip pilersaarusiorneqarneranut atatillugu pinissaa naatsorsuutigineqarpoq.
Suleqatigiinnissamut Ataatsimiititaliaqarnerup iluani pitsaanerusumik oqaloqatigiittoqartarnissaa Ingerlatsiviup sulissutigerusuppaa.